PROTOKÒL DI KOLABORASHON ENTRE ABVO I FEDEBON.

Kralendijk,- Dia 8 di yüli 2026, e sindikatonan ABVO i FEDEBON a firma un Protokòl di Kolaborashon pa formalisá i fortalesé tareanan sindikal na interes di e klase trahadó i gremionan sosial na Boneiru.

E protokòl ta un akuerdo pa konhuntamente garantisá un manera strukturá, pa  representá interesnan di trahadó. E prinsipio fundamental ta ku huntu nos ta para mas fuerte den defensa di derechonan laboral.

E protokòl ku a wòrdu  firma dia 8 di yüli 2026, ta drenta na vigor riba e mes un dia ku a firm’é i e ta pa un tempu indefiní. Kada aña, FEDEBON i ABVO  lo evaluá  e protokòl pa garantisá kontinuidat, efektividat i kaminda ta nesesario lo adaptá e protokòl na desaroyonan di aktualidat riba tereno sosial laboral i den promoshon na bienestar di tur trahadó.

Ku e akuerdo aki, ABVO i FEDEBON ta pone un fundeshi sólido, profeshonal i transparente pa un kolaborashon struktural. E akuerdo aki  ta reflehá e ambishon komun pa defendé interesnan di tur trahadó na Boneiru den un manera responsabel i konsistente.

Tantu direktiva di ABVO Boneiru komo direktiva di  FEDEBON a ekspresá nan gratitut pa e akuerdo aki i a afirmá ku nan ta konta riba un kolaborashon duradero i konstruktivo na benefisio di tur trahadó na Boneiru.

FUENTE: ABVO/LIVE99FM