ARUBA: PRESIDENTE DI PARLAMENTO NO POR PONE SU MES RIBA LEY Y REGLAMENTO

Oranjestad – Fraccion di MEP a entrega awe un keho formal na Gobernador di Aruba expresando su profundo preocupacion pa e manera cu Presidente di Parlamento Marlon Sneek ta ehecuta su funcion y ta ignora repetidamente e Reglament di Orde di Parlamento.

Dia 11 di maart 2026, MEP a pidi un reunion publico cu Minister President den su calidad como minister encarga cu Naturalesa y Medio Ambiente. Te awe, despues di varios recordatorio, e reunion ey ainda no a wordo convoca.

Sinembargo, luna pasa, Presidente di Parlamento a yama, di su propio iniciativa, un encuentro publico riba e mesun tema, cambiando unilateralmente e peticion original di MEP sin consulta ni consentimiento di e fraccion cu a haci e peticion.

Pa MEP, esaki ta un precedente sumamente peligroso. No ta tarea di Presidente pa cambia peticionnan di un fraccion segun su propio criterio. Su responsabilidad ta aplica e reglamento, no reinterpret’e of ignor’e.

Durante e encuentro publico, Presidente tambe a dicidi, sin motiva, cu cada miembro di Parlamento tabata tin solamente 6 minuut pa haci pregunta. Ora MEP a haci un punto di orden y a puntra riba cual base legal e decision aki tabata funda, pasobra e richtlijn existente ta stipula 7 minuut, Presidente Sneek simplemente a ignora, no a contesta e pregunta y a sigui cu e reunion.

Segun MEP, e asunto no ta trata di un minuut menos of mas. E problema real ta cu Presidente ta crea y cambia reglanan segun su propio criterio, sin splicacion, sin decision di Parlamento y sin respeta e proceduranan cu ta garantisa igualdad di trato pa tur miembro di Parlamento.

Lamentablemente, esaki no ta un incidente aisla. Ta parti di un patronchi caminda peticionnan di oposicion no ta wordo atendi, proceduranan ta wordo cambia unilateralmente y preguntanan tocante e base legal di decisionnan ta wordo ignora.

Den un estado di derecho, ningun presidente ta riba ley. Ni riba e Reglament di Orde.

MEP a pidi Gobernador pa tuma nota di e situacion serio aki y pa considera e impacto cu e manera di actua di Presidente tin riba e bon funcionamento di nos democracia parlamentario, e derecho di minoria y e control cu Parlamento mester por ehecuta riba Gobierno.

FUENTE: PARTIDO MEP ARUBA/LIVE99FM