CFT: “PRESUPUESTO REVISÁ DI BONEIRU TA UN PASO DEN E DIREKSHON KOREKTO, PERO NO A ELIMINÁ E PREOKUPASHONNAN”

Kralendijk – Ku e proyekto presupuestario revisá pa 2027, adaptá despues ku anteriormente Cft a apstené di emití huisio, Boneiru ta duna un paso pa dilanti. Sinembargo, e preokupashonnan tokante di e faktibilidat finansiero di e plannan ta sigui eksistí. Esaki ta loke Kolegio di supervishon finansiero di Boneiru, Sint Eustatius i Saba (Cft) a deklará, despues di un bishita di trabou di e Kolegio na e isla riba 26 di òktober. Cft a papia ku Kolegio Ehekutivo tokante di e proyekto presupuestario pa 2027 i e fortalesementu di e organisashon finansiero.

Rekursonan di kaha por stroba e invershonnan

Entidat Públiko Boneiru ta a punto di inisiá proyektonan ku ta trese gastunan haltu. Te ku 2028, Selibon mester di aproksimadamente USD 26 mion na sosten di likides. Banda di esaki, tin kontribushonnan propio pa proyektonan den Regio Deal, alohamentu di enseñansa i infrastruktura. Ta parse ku no a inkorporá tur e gastunan aki den e presupuesto finansiero. Esaki ta nifiká tambe ku ta difísil pa estimá adekuadamente e rekursonan líkido, ku ya kaba tin disponibilidat limitá. E rekursonan líkido aki ta nesesario pa efektivamente por hasi e invershonnan importante.

Organisashon finansiero: integral i salbaguardiá

Kolegio Ehekutivo a presentá medidanan pa fortalesé e organisashon finansiero, inkluyendo un análisis di gap, un siklo fiho di Planifikashon & Kòntròl, i kontroladónan serka e direkshonnan. Gezaghèber tambe a menshoná e análisis di gap den su karta na Sekretario di Estado, komo medida pa fortalesé e organisashon i e kapasidat di implementashon di Entidat Públiko. Cft ta konsiderá ku esaki ta positivo. Konsiderando e echo ku elekshonnan ta aserkando, ta nesesario pa salbaguardiá e mehorashonnan aki permanentemente, pa asina un Kolegio Ehekutivo siguiente por konstruí riba nan. Cft – siendo stakeholder aktivo – lo sigui e desaroyonan aki ku detenshon.

Turismo

Cft a papia ku TCB, Bonhata i Stinapa tambe. Turismo ta representá aproksimadamente mitar di e ekonomia di Boneiru, i p’esei ta un pilar importante pa finansa públiko saludabel i duradero. Cft ta enkurashá Boneiru pa desaroyá un vishon multianual riba turismo i pa konektá un agènda di invershon na esaki, pa asina pèrkurá pa e isla keda atraktivo pa bishitantenan futuro tambe. Atrayendo turistanan di e hemisferio oksidental, ta repartí turismo i ta redusí e bahada den temporada abou, pa asina e entradanan keda konstante riba término largu tambe.

FUENTE: CFT BONAIRE/LIVE99FM