E SIMAN TRAS DI LOMBA A BOLBE DEMONSTRÁ E IMPORTANSIA DI PRENSA KOMO WATCHDOG DI DEMOKRASIA

Kralendijk, – E siman tras di lomba a bolbe demonstrá e importansia di Prensa komo watchdog di demokrasia i pa trese na klaridat asuntunan ku ta keda orkestrá tras di kòrtina i ta keda skondí pa e pueblo. No tin ningun duda ku komunidat di Boneiru pero tambe pafó di Boneiru ku ta sigui Boneiru su desaroyo a tuma nota ku apesar ku tres luna pasá a forma un koalishon riba preshon di pueblo pa atendé ku su interesnan, e resultado den tres luna ta masha tiki, pa no bisa nada. Un miniprograma bou di e título Ordená,Stabilisá i Avansá a pone e siguiente prioridatnan

1.FINANSAS NA ORDU. Un fundeshi finansiero stabil ta nesesario pa kualke forma di bon gobernashon. E enfoke ta riba restorá supervision, garantisa legalidat, i logra un presupuesto ku ta responsabel i ku nos por ehekutá efektivo na bienestar di pueblo. Fondonan di Hulanda den forma di vrije uitkering, Bijzondere uitkering konbiná ku reservanan di destinashon, reservanan na banko i propio entrada ta un base finansiero sólido pa por a traha e resto di e periodo aki. Diputado Jennifer Mohammed Joenoes ta esun enkargá ku esaki

2.INFRASTRUKTURA. Esaki ta e doló di kabes di años, esta rehabilitá kareteranan dañá i traha kamindanan nobo pa e interkonektividat di tur bario ta sigur i aksesibel. Pèrmitnan tambe ta un doló di kabes. Diputado Dennis Martines enkargá ku e parti aki.

3 PROSPERIDAT | KONSIENTISHON AMPLIO. Koalishon kier kambia e enfoke for di solamente sosten di entrada pa inklui tambe mas konsientisashon, outosufisiensia i resiliensia mental. Maneho mester enfoka riba sostené esnan ku ta den nesesidat di forma imediato pa nan por tin un bida soshalmente akseptabel i inklusivo. Tur esaki di un forma sostenibel dor di entre otro hasi mihó uso di rekursonan disponibel. Diputado Timoteo Silberie enkargá ku e tarea aki.

Kòntròl i Siguimentu(VTH) Seguridat i Ordu i Bon Gobernashon tambe a forma parti di e miniprograma. E miniprograma aki a keda firmá pa e 5 konsehalnan bou di e siguiente lema: Ku FE,  Speransa | ku Amor pa Boneiru. Un bunita programa, realístiko, faktibel i kargá pa dualismo i bon gobernashon. Nos komo pueblo aki for a komprondé ku den Konseho Insular a debatí ku otro riba e puntonan aki, aprobá nan i duna mandato na Bestuurscollege, esta e tres diputadonan huntu ku gezaghèber i ku sosten di e aparato pa bai ehekutá e programa den e próksimo lunanan te na elekshon di mart otro aña. Wèl loke sindikalismo i henter pueblo a eksperenshá durante e tres lunanan aki ta pleitamentu riba oumento di salario di kolaboradornan/konseheronan di diputadonan, nombramentu di hende den e aparato i/o hendenan eksterno ku diskushon ku ta usa OVO òf hinka den aparato, dunamentu di tereno, falta di komunikashon, violashon di dualismo i finalmente kiebro atrobe na momento ku un di e partnernan por eskrito a kita konfiansa for di su partner di koalishon, pero a keda sostené te ainda e diputado di e partner. Nos no a tene ningun resultado di e ehekushon di e miniprograma. Ku e aktitut aki e imahen polítiko a baha na sero, e konfiansa di pueblo den su mandatarionan pa tiki ku e tabata, a sigui baha. Nos ta den un krisis polítiko gubernamental ku manera kos ta pinta e 9 miembronan no por solushoná riba nan mes, pasobra niun no ta konfia otro, intervenshon ta parse inevitabel i nos ta hasiendo un daño grandi na nos deseo komo pueblo , demonstrando inmadures pa outogoberná nos isla. Kien gusta òf nò sindikalismo mester konsiderá pa tuma un posishon kla den esaki, pasobra no balotá e efekto negativo ku esaki por tin riba nos ekonomia i kuné riba nos merkado laboral. Lo mi elaborá riba esakinan den un edishon separá.