BIG DADDY TÁ REGRESÁ DEN BON FORMA

Kralendijk–Fin di siman pasá Fittipaldi Pietersz a pusta ku su motosaikel Big Daddy na Kòrsou. Despues di 9 aña Fittipaldi a bolbe pusta ku su motosaikel preferí.

El a bisa apesar ku e konosé e motosaikel pa mas ku 30 aña, momentu bo keda un tempu largu sin pusta kune, e promé biaha riba pista,  no ta bai asina fásil. Pero e por sinti ku e i e motosaikel ta hañando nan forma pa bira un ku otro.

Di tur manera Fittipaldi ta masha kontentu kon kareda a bai. “Sigur mi ta hopi kontentu. Mi deseo tabata pa kore ku mi motosaikel preferí riba e pista ku mas mi a logra gana kareda aya na Kòrsou.

Despues di 9 aña sin pusta i e motosaikel di 35 aña, mi no ta pensa pa kore manera 20 aña pasá. Pero el a sorprendé mi i motivá mi, pa dune mas atenshon atrobe. E ta bon i djis mi mester drecha algun kos chikitu, pa e por ta asta kompetitivo.

Mi a gana 3 buèlta djasabra anochi riba pista na Rondeklip, pa despues pèrdè ku un breakout di dos honderste sekònde.

Big Daddy tin 35 aña
Manera mi a bisa mi motosaikel preferí tin 35 aña i asina hopi logro, mi no ke pa su kabes morde, mi no ta bai kore ku Nitro, tampoko ku tur su potensia.

P’ami el a hasi mas ku sufisiente i awor nos por kore trankil. Su mihó tempu tá 8.55 sec, sin gaña, mi no ta kla pa bolbe kore e tempu ei mas.

Mi ke protehe, pasobra e ta e motosaikel ku un historia asina amplio den Karibe, mas ainda, no tin niun motosaikel ku el a topa 29 aña pasá, ku awendia ainda ta pusta riba pista, ku asina hopi logro. Boneiru por ta mas ku orguyoso di Big Daddy.

Danki na tur esnan ku a yuda mi pa pone Big Daddy bek riba pista. Danki Gobièrnu di Boneiru, NAPA Auto Parts i Don Andres. Boso ta pèrkurá pa Boneiru ta grandi.

FUENTE: FITTIPALDI PIETERSZ