FUNDASHON PLATAFORMA KULTURAL (FPK) TA KANSELA PRESENTASHON NA PARKE WILHELMINA .

Kralendijk,- Fundashon Plataforma Kultural (FPK) ta informá ku, ku hopi tristesa i desepshon, su orkesta di di adulto mayor(50+) a keda obligá pa kanselá su presentashon durante e Selebrashon di Konmemorashon di Abolishon di Sklabitut na Parke Wilhelmina.

Na 2025 e orkesta a presentá ku hopi éksito durante e konmemorashon i e pa e aña aki tambe e orkesta tabata inkluí ofisialmente den e programa. Sin embargo, despues di mas ku nuebe luna di spera pa un desishon tokante e petishon di subsidio pa aña 2026, e direktiva di FPK no tabatin otro opshon sino di tuma e desishon doloroso di kanselá su presentashon na e Konmemorashon di Abolishon di Sklabitut.

Fundashon Plataforma Kultural a entregá su petishon di subsidio na OLB (SKAL) na luna di sèptèmber 2025. Te awe, despues ku mitar di aña 2026 a pasa, ainda no tin klaridat si e fundashon lo risibí e subsidio anual.

Durante e promé seis luna di 2026, FPK a logra sigui funshoná usando  e reserva finansiero ku e fundashon tabatin. Awor ku e reserva a kaba, no ta responsabel pa kontinuá ku aktividatnan sin siguridat finansiero.

Den e periodo aki, FPK a mantené kontakto regularmente ku SKAL i ku diferente funshonarionan di OLB. Tur biaha e mensahe tabata meskos: tene pasenshi. Awor, e fundashon a yega na un punto kaminda e no por sigui sostené su aktividatnan sin e sosten finansiero nesesario.

E subsidio ta esensial pa por kubri gastunan manera kumpramentu di instrumènt, kompensashon pa boluntarionan, pago di dosentenan, hür di lokalidat i otro gastunan operashonal.

FPK ta invertí den Boneiru su adulto mayornan.

Pa mas ku 15 aña, FPK a traha pa mehorá e kalidat di bida di Boneiru su adulto mayornan. Mas ku 100 adulto mayor ta partisipá tur siman na aktividatnan ku e fundashon ta organisá.

Entre e aktividatnan tin lès di kuarta, lès di simfonía, baile folklóriko, mainta ku obra di man i diferente otro aktividatnan kultural. Tur e aktividatnan aki ta kompletamente GRATIS. Dor di e aktividatnan aki, adulto mayornan ta keda den kontakto ku otro, ta keda aktivo físikamente i mentalmente, ta desaroyá nan kreatividat i na mes tempu, ta kontribuí na mantené Boneiru su kultura bibu.

E desishon pa FPK kanselá su presentashon no tabata fasil. FPK no por kontinuá ku su aktividatnan sin e subsidio. E speransa ta keda ku OLB lo por aprobá e paga e subsidio asina e adulto mayor por sigui bini pa disfrutá di momentunan inolvidabel ku FPK porofresé.

FUENTE: DIREKTIVA FUNDASHON PLATAFORMA KULTURAL/LIVE99FM