PLAN DI INDEPENDENSIA DI KORIENTE PA E FAMIANAN BONEIRIANO

Kralendijk,-  Rafael Santana ta presentá un Plan di Independensia di Koriente pa e Famianan Boneiriano, ku tin como meta baha e gastunan haltu di koriente i duna un solushon permanente i sostenibel pa nos famianan.

E plan ta proponé instalá den kasnan un sistema básico di energia renovabel ku ta konsistí di:

– Un inversor/transformador di 4.000 watt.

– Un banko di baterianan di 12 òf 24 volt, segun e nesesidat di cada kas.

– Panel solar pa karga e baterianan durante dia.

– Posibilidat di agregá un molin di bientu chikí na lugánan kaminda e ta apropriá, pa sigui karga e baterianan ku energia di bientu.

Ku e sistema aki, e energia ku ta wordu produsí durante dia ta warda den e baterianan pa usa anochi òf ora no tin solo. Dependiendo di e konsumo di e kas i e kapasidat di e sistema, e por suministrá energia pa aparatonan esensial manera frishidèl, lus, bentiladó, televishon i otro ekiponan di uso diario durante hopi ora.

E proposishon ta pa usa parti di e fondo ku awor ta wordu gastá na subsidio di koriente pa finansia e sistemanan aki pa e famianan ku mas mester apoyo. Di e manera aki, en bes di sigui paga subsidio kada luna, Gobierno ta hasi un invershon permanente ku lo yuda e famianan produsí nan propio koriente i baha nan fakura di energia konsiderablemente.

E plan ta proponé ku e Konseho Insular evaluá i aprobá e iniciativa. Despues, e Kolegio Ehekutivo por elaborá e plan di eksekushon i buska koperashon ku Gobièrnu Hulandes i otro institushonnan pa logra e finansiamentu nesesario.

Esaki ta un invershon den futuro di Boneiru: un manera pa fortifiká e ekonomia di nos famianan, baha e dependensia di petroleo, redusí e gastunan di subsidio na largu plaso i yega na un Boneiru ku ta mas independiente riba tereno di energia.

Hustu, Union i Oportunidat pa Tur.

FUENTE: RAFAEL SANTANA