Redakshon
Kralendijk,- Satisfecho ku a dirigí e petishon pa tuma medida riba dos faktor ku indudablemente ta kousa un inflashon oumentando preisnan riba produkto i servisio.
Ta trata medida riba e oumento di preis di transporte i esun di kombustibel. Pa loke ta e preis di transporte e komponente di ABB, esta belasten riba e transporte ta un komponente ku por eliminá sea temporal o permanentemente mes i asina e kostprijs di e produkto na porta ta baha.
Igualmente ta e petishon pa baha accijns, ku ta e belasten riba e produktonan petrolero, entre kual gasolin ku aktualmente ta kasi 32 dòlarsèn pa liter riba e preis di 1.33 dòlar pa liter di gasolin.
E petishon ta pa baha e accijns, esta e belasten ku 15 dòlarsèn di moda ku preis di gasolin lo bira 1.18 pa liter na pòmp. Ta keda ainda si e preis di kònteinernan ku lo subi sigur minimal dòbel na preis.
Awor ku Kolegio Ehekutivo a hasi su huiswerk direkshon Den Haag, tin huiswerk pa hasi aki na kas mes tambe.
Si logra baha e preisnan na porta di importashon i na pòmp di gasolin, nos komo konsumidó mester mira esakinan tambe den e preisnan riba merkado pa produkto i servisionan.
Ei nos ta di opinion ku Kolegio Ehekutivo tin dos responsabilidat i esei ta reuní ku importadónan pa asina dentro di e outoridat ku e lei di preis ta duna Kolegio Ehekutivo stipulá un makutu básiko ku produktonan mará na un margen di ganashi máksimo.
Kòrda no na un preis máksimo sino un margen di ganashi màksimo. Na nos humilde opinion un medida asina lo no haña resistensia di e komersiante, ya ku e no ta keda perhudiká sino mas bien e ta yuda karga e peso den tempunan difisil aki.
Unabes yega na e palabrashon aki, e di dos medida ta pa duna informashon agresivo dor di Fundashon Tienda pa Konsumidó pa hasi e pueblo konsiente di e medida aki. Pa e promoshon aki Kolegio Ehekutivo por pone fondonan spesífiko.
E otro medida pa kompañá e medida aki ta supervishon severo kontra violashon di e medidanan. Pa konvensé Ulanda ku aki ta trata di un asuntu serio lo ta bon pa USIBO tuma inisiativa den Dialogo Sentral pa en todo kaso komo partnernan sosial sostené e petishon di Kolegio Ehekutivo i deliberá kua medidanan mas tantu for di Den Haag pero tambe lokalmente por tuma pa prepará pa e tempu di krisis. Un di nan sigur por ta fondonan speshal pa kombatí pobresa i via Den Haag un fondo di krisis pa kubri oumento di preis di energia i awa. Por konsideerá tambe pa subi e plafón di hür di kas ku ta bin na remarke pa supsidio. Na e pueblo mes i sigur na e gruponan mas vulnerabel e konseho ta pa atendé ku e sèn di luna ku koutela i usa e sèn realmente pa kosnan di nesesidat i wanta un poko ku gastamentu pa loko di bo entradanan mensual òf pa kinsena.
E programa ku Akseso a organisá den barionan kaminda ta duna informashon kon atendé ku bo sèn ta un inisiativa sumamente positivo i nos ta hasi un yamada pa mas hende ku ta posibel asisti na e atardi/anochinan di informashon aki.
Bo ta siña hopi i bo por logra trese den bo kas un trankilidat finansiero. Riba término mas largu Kolegio Ehekutivo i Konseho Insular lo mester sigui traha riba entrodukshon di transporte públiko (si por gratis o gratis pa sierto gremionan), duna sosten serio na e sektor di produkshon di nos kuminda, esta plantamentu, krio di bestia i peskeria, ku medidanan di protekshon i tambe posibilidatnan pa supsidio pa tene e preisnan pagabel pa pueblo.
Mester konsiderá tambe e insisiativa di un komersiante lokal pa lanta un sentral di kumpra produkto na kantidat, esta un inkoopcentrale.
Pues tin trabou balioso pa hasi komo gobernasho, pero tambe sektro privá kual ta muchu mas importante ku e guera polítiko ku kada biaha di nobo ta lanta kabes i ta stroba mas ku e ta yuda.
FUENTE: NORWIN NÒCHI WILLEM
GIPHY App Key not set. Please check settings