SINDIKALISMO KIER ATVERTÍ DUNADÓNAN DI TRABOU DI MALA FE KU NOS LO NO TOLERÁ KONTINUASHON DI E ABUSO KU NAN TA KOMETÉ KONTRA E TRAHADÓ I SU FAMIA.

Kralendijk,- Nos a konstatá dos fenómeno den nos sosiedat i mesora nos a pone inspekshon di labor na altura di e situashonnan indeseabel aki. Nos a konstatá dos fenómeno.

Ta buska trahadó imigrante dunando informashon na imigrashon ku lo paga nan e sueldo minimo ku ta aktualmente Usd. 1794 pa luna pa un siman di 40 ora di trabou. Sinembargo fin di luna ora di pago di salario, e trahadó ta mira solamente un parti di e sueldo minimo aki aparesé riba su kuenta di banko. 

Pregunta ta kiko e dunadó di trabou ta hasi ku e diferensha ku e no ta depositá. Sindikalismo ta buskando e kontesta, pero tin tur indikashon ku aki ta trata di tráfiko di hende riba un nivel masha suptil mes. E otro fenómeno ku ta tumando lugá ta ku ora e imigrante bai imigrashon pa buska alargashon di su pèrmit di trabou ku ta habri e posibildiat pa e biba riba nos isla e tin ku konstatá ku imigrashon ta nenga di alargá su pèrmit di trabou pa motibu ku su dunadó di trabou tin debe di belasten.

Aki informashon ta indiká ku mensualmente e dunadó di trabou ta retené e suma di belasten pero no ta paga esaki na ofisina di impuesto, kreando asina un debe. E peligroso di esaki ta ku e imigrante ta sin pèrmit di trabou, pues e ta indokumentá riba nos isla i komo tal por enfrentá e proseso di deportashon, esta di saké for di Boneiru.

Sindikalismo kier hasi un yamada riba trahadónan imigrante pero tambe riba e diferente organisashonnan di imigrantenan pa mas pronto posibel sea nan afiliá nan un sindikato eksistente òf lanta nan propio sindikato. USIBO ta dispuesto pa guia nan den kualkier eskoho ku nan hasi.

No por sigui tolerá e eksplotashon, abuso i hasta tráfiko humano aki riba nos isla. I a yega tempu pa inspekshon di labor baha ku man duru riba e violadónan di mala fe aki i hasta publiká nan nòmber ku fam i pone nan riba lista di persona non grata den nos sosiedat.

Sindikalismo na vários okashon ta skucha e lamento ku hóbennan ta reklamá ku no ta skucha nan i ku e generashon di  hende grandi ta praktiká un sistema hirárgiko den kua no ta duna ni krea espasio pa skucha e hóben ku ta esun ku tin ku karga e futuro.

E fenómeno aki no ta nada nobo pero si tin un diferensha fundamental den e hubentut di antes i esun di awor. Pa eksigí ku ta skucha bo bos ta un forma tin i esei ta organisá bo mes den un grupo ku ta lucha pa e mesun meta. E pensamentu ku e hubentut ta hiba di ta bon siñá i ku e mes por solushoná su problemanan ta eroneo i ta krea solamente frustrashon, ya ku nos sosiedat su fundeshi ta ankrá riba poder di interesnan.

I poder solamente por ta den balansa ora tin otro poder ta operá den e sosiedat. Pues mi konseho na e klase hubenil ta, organisá boso mes. Tuma e ehèmpel na sindikalismo ku poko poko pero sigur ta organisando e klase trahadó.

Ta un derecho ankrá den nos konstitushon pa organisá bo mes i mi ta garantisá ku e ora ei usando e otro derecho fundamental di ekspreshon liber lo obligá komunidat i sigur e gruponan di interes ku poder pa skucha boso bos.

Aki tambe USIBO ta dispuesto di duna un man pa yuda boso organisá boso mes, fiha meta, skohe liderato i aktua ku positivismo i determinashon pa konstruí huntu ku e grandinan boso futuro i esun di boso yunan. Para na banda, yora no ta yuda e kousa.

Un manera pa komunidat skucha boso bos ta ku boso komo forsa laboral hóben i profeshonal tuma e desishon di sea afiliá na un sindikato eksistente o lanta boso propio sindikato.

Kiko boso ta warda, boso tin e talento, boso tin e konosementu, boso tin e kantidat, Laga individualismo para un banda i realisá ku UNION ta boso forsa.

FUENTE: NÒCHI WILLEM/LIVE99FM