IMIGRANTE Y BONERIANO PAGA BON TINU !!

Kralendijk,- Si bo ta bai afó, sòru pa bo bai ku ménos ku $ 10,000.- na cash! Si bo ta bai ku mas ku
$ 10,000.- na plaka efektivo, bo por haña bo den hopi problema.

Gobièrnu di Hulanda a pasa un lei pa Boneiru (es desir pa ‘BES’) ku ta prohibí un y tur pa biaha bai afó ku mas ku

$ 10,000.- na cash. Si bo tin bon motibu pa bai ku mas ku $ 10,000.- na cash, bo tin ku mèldu esaki delantá na duana. Anto e ora ei, bo por haña pèrmit. Pero bo mester mèldu delantá. Si nò, ta hasta kastigu di prizòn bo por haña. Esaki no ta wega.

E medida aki ta pa prevení ku hende ta bai ‘laba plaka’, òf pió, ta bai finansiá terorismo. E lei konserní yama: ‘Lei pa Prevení Labamentu di Plaka y Finansiamentu di Terorismo BES’ (Wet ter voorkoming van witwassen en financieren van terrorisme BES).

Chèk e lei na internèt. Lesa art. 4.2 ku 6.1.

Nos fuente a informá nos ku tabatin vários imigrante ku a kai den e trampa aki kaba. Pero Boneriano tambe por kai aden.

E lei ta konta pa un y tur. Pues, simplemente, no bai afó ku mas ku $ 10,000.- na cash nunka. Anto si tin bon motibu pa bai ku mas, tuma kontakto ku duana promé.

E pober hendenan ku a kai den e trampa aki, a wòrdu arestá y detené.

Y outoridat a konfiská tur nan plaka. Nan a haña but pisá (te $ 5,000.-). Y despues di algun dia di detenshon nan por a bai kas. Aparentemente nan a yega na un ‘transakshon’ (es desir, un ‘deal’) ku outoridat, kende a kita e but di $ 5,000.- y a duna nan sobrá di nan sèn bèk.

  

Nos no ta defendé e lei aki. Nos ta djis atvertí tur imigrante y tur Boneriano ku e lei aki ta na vigor. No hinka bo mes den problema.

Tene bo mes na lei. Si tin duda, tuma kontakto ku duana.

Pa ser sinsero, e lei aki ta un abominashon, ku no mester eksistí mes den un sosiedat demokrátiko basá riba libertat. Y e lei lo no por realisá su meta tampoko.

Pasobra berdadero kriminalnan lo buska otro método pa laba plaka of finansiá terorismo. Un di nan ta pa kombertí nan sèn den asina yamá ‘crypto-currencies’, manera ‘bitcoin’. Entre paréntesis, e ‘crypto-currencies’ aki ta otro webu di gai, es desir nan lo kòlèps un dia.

Pero esei ta otro tópiko.

Kualkier imigrante ku ta deseá di haña mas informashon presiso over di esaki of otro problema hurídiko por tuma kontakto ku Direktiva di FUIB (yama: 787 2373) of por pasa libremente na nos Konsultorio hurídiko grátis tur djasabra di 4’or te 6’or di atardi na Ofisina di Abog. Bijkerk na Antriol. Adrès: Kaya Jose G. Hernandez 16A. Telefòn y whatsapp: 796 2650.

FUENTE: FUIB ABOG. M. BIJKERK