SINT MAARTEN: ENTRENAMENTU EKSITOSO FORÉNSIKO DI CARICOM TA FORTALESÉ E ASERKAMENTU KONTRA KRIMEN DI ARMA DI KANDELA DEN REGION KARIBE.

Philipsburg,- Di djáluna 2 te ku djabièrnè 6 di yüni 2025 a tuma lugá na Sint Maarten un entrenamentu forénsiko spesial di sinku dia, riba un téknika inovativo di análisis forénsiko.

E entrenamentu aki, organisá pa CARICOM, den kolaborashon ku e Trinidad and Tobago Forensic Science Centre (TTFSC) i e Kuerpo di Polis Sint Maarten, ta yuda e personal di polis pa resolvé krimen di arma di kandela na un forma mas efisiente.

Seis investigadó forénsiko a partisipá na e entrenamentu aki: dos di Kuerpo Polisial Kòrsou, dos di Kuerpo Polisial Aruba i dos di Kuerpo Polisial  Sint Maarten.

Nan a siña un ténika avansá ku por yuda atendé ku  krimennan  relashoná ku arma di kandela, na un forma mas rápido i efikas. E entrenamentu ta hopi nesesario, pasobra tur pais i isla den e parti Karibense den Reino ta biba ku un oumento di insidentenan di tiroteo.

E Kolegio di Hefenan di Polis ta ekspresá su preokupashon tokante e gran  kantidat di arma di kandela ku ta sirkulando den e region.

E entrenamentu aki a bira posibel pa medio di e kolaborashon regional fuerte  entre e Kolegio di Hefenan di Polis  i CARICOM IMPACS. CARICOM IMPACS (Implementing Agency for Crime and Security-Agensia di Implementashon pa Krimem i Seguiridat) ku ta e órgano di seguridat  dentro di e Komunidat di Karibe i a keda  fundá na 2006 pa stimulá un maneho koordiná di krimen i seguridad den e region. E órgano aki ta desempeñá un ròl klave den fortalesé e kolaborashon entre Polis, Imigrashon, Duana i servisionan di inteligensia, di paisnan ku ta miembro.

CARICOM IMPACS ta ehekutá proyektonan regional, ta kolektá i analisá datos tokante tendensianan di kriminalidat, i ta asesorá e paisnan miembro tokante strategianan di seguridat. Pa medio di e tareanan aki , CARICOM IMPACS ta kontribuí na mehorashon di e kapasidat i e efikasia di e servisionan di seguridat regional. E sede prinsipal ta lokalisá na Trinidad i Tobago.

Tur partisipante a finalisá e entrenamentu ku éksito. Durante su diskurso na e seremonia di entrega di e sertifikadonan,  e Hefe di Kuerpo di Sint Maarten, Carl John, a enfatisá ku e kolaborashon ya a duna resultado inmediato.

No solamente pa medio di entrenamentu manera esaki, pero tambe pa medio di un interkambio di informashon más rápido tokante kriminalnan, ku ta krusa e region Karibense pa kometé delitonan kastigabel. “Region Karibe  no ta un lugá sigur pa kriminalnan mas,” segun John.

El a indika ku ta e intenshon pa den e tempunan benidero pa fortalesé e lasonan aun mas; entre otro pa medio di organisá e terser Enkuentro di Ret Regional pa analistanan di kriminalidat, kual lo tuma lugá mas despues durante e aña aki.

Ku e kolaborashon intensivo aki, e region ta tuma un paso importante den direkshon di un Region Karibe mas sigur.

FUENTE: KOLEGIO DI HEFENAN DI POLIS/LIVE99FM