NO POR SIGUI ASINA.

 Kralendijk,- Di akuerdo ku e konsehal Dany Crestian, ku e violensia ku a lanta kabes ultimamente no por sigui asina.

Den un tempu kòrtiku tabatin  kantidat di atrako armá, tiroteo i bringamentu hopi violento. Esaki no ta e Boneiru ku nos konosé!!!!! I apesar ku konseho insular a pasa un lei, riba petishon di e triánguló kabesá pa gezaghèber pa listra hende i pone kámará na diferente lugá, tòg e violensia ta sigui.

Imaginá bo, a atraká e ofisina di postkantoor den dia kla. A atraká  un supermerkado tambe . Tiramentu riba kas di hende i riba hende a para bira manera algu normal.

Tambe e bringamentu na skol a bira algu manera komun i koriente!! Anto awor pa korona obra den e wikènt ku a pasa aki a tira un hoben ku konsekuensia ya konosí.

Mi pensamentunan i mas profundo kondolensia ta bai pa famiannan di e viktima hoben i tur otro viktima di violensia riba nos isla.

Na unda nos ke bai asina? Komo tal mi kier a hasi un súplika speshal na gezaghèber di Boneiru ku ta enkargá ku seguridat, huntu ku Ministerio publiko i polis pa por fabor sòru pa pueblo di Boneiru por tin e pàs i seguridat ku sèmper  tabatin!!

No ta pasobra na otro paisnan tin violensia kier men aki tambe mester tin! Boneiru no ta dje grandi ei pa sòru pa tin e garantia ku pueblo por biba trankil sin ku tin violensia anto ku arma di kandela.

Pa awor aki mi no kier bai den detaye, kon bin i di unda tur e arma nan di kandela ta drenta.Pero si mi kier pa kuminsá atendé ku e prevenshon i seguridat ku mester tin.

Poko poko pero sigur por a eksperensiá ku e prevenshon aki a bai atras, apesar ku a atvertí esaki di basta aña pasá.Sigur for di momentu ku a sòru pa  kita kuerponan manera VKB y SSV ku e tempu nan prome ku 10-10-10 tabata yuda sigur ku e parti preventivo .

Kisas lo ta bon pa ban wak kon SI lo por akitivá e kuerponan aki bek pa yuda ku e parti preventivo. Mi ta spera pa e kuerpo nan konserní ku ta kai direktamente bou di e ministerio nan hulandes pa nan tuma nan responsabilidat ku nan a tuma for di 10-10-10 i sóru pa Boneiru tin pas i trankilidat!!

Ademas awor aki no ta e ora pa traha ningun plan! Awor ta e ora pa aktuá!! Pasobra tur hende sa na unda e problema ta sinta.

Si no tuma e situashon aki na serio, Boneiru realmente lo bira un ‘wild wild west’. Tambe mi ta kere ta NOS TUR komo siudadano di e isla aki mestar asumí nos responsabilidat di aktua ora nos mira kos robes ta tuma lugá , no ta paso no tin di haber kubo direktamente nos ta tolerá , paso un dia e lo yega serka dibo tambe , ta huntu nos mester kombatí loke ta pasando na e momentu nan aki riba nos isla. Pa esaki mi ta kere ku gezaghèber komo e lider di triaguló lo por konta SIGUR ku nos sosten  pa kualke desishon ku mester wòrdu tumá den konseho insular.

Paso No por sigui asina!!!!

 FUENTE: KONSEHAL DANY CRESTIAN