GUYANA/ SINT-MAARTEN: HEFE DI KUERPO POLISIAL CARL JOHN SKOHÉ KOMO PROMÉ VISE PRESIDENTE DI ACCPUN REKONOSEMENTU IMPORTANTE PA E PARTI KARIBEÑO DI REINO HULANDES

GEORGETOWN/PHILIPSBURG – Durante e  di 39 Reunion Anual di e Association of Caribbean Commissioners of Police (Asosiashon di Komisarionan di Polis Karibense (ACCP), ku a tuma lugá di 12 pa 16 di mei 2025 na Arthur Chung Conference Centre na Georgetown, Guyana, Komisario Carl John, Hefe di Kuerpo Polisial di Sint Maarten i Presidente di e Kolegio di Hefenan di Polis di e parti Karibeño di Reino Hulandés, a keda skohé komo promé Vise-presidente di ACCP.

E nombramentu di Komisario John pa e funshon prominente aki den ACCP ta un gran rekonosementu di su entrega i liderasgo, i un honor pa e region Karibeño di Reino Hulandés. Esaki ta demostrá ku e kontribushon di e islanan na seguridat regional no solamente ta di apresiá, pero tambe ta wòrdu aktivamente fortalesé riba plano internashonal.

ACCP, fundá na 1987, ta uni Hefenan di Polis di mas ku 20 pais i territorio den Region di Karibe. E organisashon ta stimulá kooperashon, kompartimentu di konosementu i un/e aserkamentu konhunto kontra problemanan di kriminalidat ku ta transende fronteranan nashonal.

Kuerponan afiliá tur ta enfrentá retonan similar:  krímen violento, tráfiko di droga, tráfiko humano, krimen sibernétiko, problema hubenil i e impakto di desigualdat sosio-ekonòmiko riba seguridat. Ademas, desaroyo di kapasidat, digitalisashon di detekshon i fortifikashon di polis di komunidat tur ta hungando un ròl kada bes mas importante den e debate regional.

E ròl di ACCP den e struktura di seguridat regional di Caribe ta fundamental. E forsa di e ret di ACCP ta sintá den promové konfiansa mutuo, hasi posibel koperashon den práktika, i e interkambio direkto di konosementu i eksperensia. Sigur pa  kuerponan mas chikí – ku hopi biaha ta karga  gran responsabilidat pero ku rekursonan limitá – ACCP ta un plataforma di gran balor. No solamente pa medio di e laso ku koleganan den region, pero tambe pasobra e ta ofresé entrada na ekspertisio, formashon, i representashon di intersnan komun.

E tema di e konferensia ‘United in Action, Transformed in Purpose: Building an Integrated Caribbean Security Architecture’ ‘Uní den Akshon, Transformá den Propósito: Konstruyendo un Arkitektura Integral di Seguridat di Karibe’– ta enfatisá e nesesidat pa mas kooperashon integral i transfronteriso.  Den e lus ei e elekeshon di Komisario John tin un balor simbóliko tambe: komo Hefe di Kuerpo di un isla ku lasonan estrechamente ku tantu e strukturanan di seguridat Karibeño komo esnan Hulandés, e ta trese  aden kapasidat pa konstruí brugnan di konekshon i ekperensia internashonal.

Komo promé Vise-presidente, Hefe di Kuerpo Polisial John, lo aportá na e direkshon i toma di desishon  dentro di ACCP, i lo kolaborá pa fortalesé e koperashon entre estadonan miembro.

E nombramentu di Komisario John no ta kasualidat.

E konosé ACCP bon, sa kiko kooperashon realmente ta nifiká den práktika i ta un bos di outoridat tokante e realidat di kuerponan mas chikí.

Komo Hefe di Kuerpo di Polis di Sint Maarten i Presidente di e Kolegio di Hefenan di Polis, e ta trese ku ne eksperensia ku ta konektá ku e temanan ku ta aktualmente relevante den nos region. Esaki ta hasi’e un representante ku peso i enbolbí na e nivel aki.

FUENTE:KOLEGIO DI HEFENAN DI POLIS/LIVE99FM