POLITIKONAN O FIGURANAN PÚBLIKO DEN POSISHON DI LIDERAZGO PUEBLO TIN E DERECHO PA KUESTIONÁ NAN AKSHONAN I DESISHONAN PÚBLIKO.

Kralendijk,-  Willem Cecilia, despues ku el a ataká públikamente e sakrifisio, speransa, i derechonan di pueblo Boneriano tokante ponementu di Boneiru riba lista di Nashonan Uni, a revelá su kara berdadero: Plataforma Boneiru Nobo (PBNO). Su máskara a kai. Awor e ta funshoná komo un representante polítiko i portavóz pa e mesun grupo di status quo ku a perde mahos e referendum di 2015.

PBNO no ta mas ku e dinastía biew di UPB den un bachi nobo—mesun karanan, mesun agenda, mesun trampa. E ta Laso Direkto 2.0: e aliansa konosí di polítikonan di UPB, historikamente lidera pa Ramonsito Booi i Burney Elhage, e mesun grupo ku a manipula Bonaire ku Bonaire Nobo i Laso Direkto rumbo pa 10-10-10.

E mesun grupo di UPB aki a split ku tempu, kreando spin-off manera MPB i M21 I konseheronan ets. Ta importante pa rekorda ku e kampaña pa Boneiru Nobo Laso Direkto a ser reporta den prensa pa medionan lokal i hulandés ku nan a risibí mas ku mei miyon for di polítika hulandés—spesífikamente di partido CDA. E Fundashon Pro Directe Banden, lidera pa Evo Cicilia i Edison Rijna, segun prensa, e fondo a wordu huza pa korumpí polítikonan lokal i manipulá elekshonan i referendum. Awor, 20 aña despues, hopi di esunan ey mes ta bolbe den diferente grupo, partido I formashon? — re-invinta komo PBNO 2.0?

Na 2003–2004, un otro plataforma a surgi: e Plataforma Sosial Ekonomiko (SEP), promové pa lidernan di sektor priva ku tabata Evert Piar, Marisella Croes i Raymundo Saleh. Nan a lansa i promové “Bonaire Nobo” .  E asina yama “Laso Direkto” KU Hulanda, ku despues a kambia na integrashon DEN Hulanda—sin konsentimiento di pueblo i kontra voto di pueblo. Ramonsito a bisa “Mara na man ku pia,” mientras ku e lidernan ku el a krea tabata bisa “Bo no por kome autonomia.”

Nos tur ta rekorda e odisea di 10-10-10 i e daño ku e a trese. Poko a sobrebibi e impakto destruktivo ku esaki a kausa.

Mientras e polítikonan resiklá aki a insistí ku nada mas por ser hasi, nos a hanja un kaminda pa dilanti, un solushon: pone Boneiru bek riba lista di Territorionan Sin Propio Gobernashon – teritorionan no outonomo(NSGT) di Nashonan Uni. E derecho aki a wordu nenga I ignora pa hopi tempu. Bao di Artíkulo 73 di Charter di Nashonan Uni, Boneiru ta protehá dor di lei internashonal i tratadonan di derechonan humano, i Hulanda ta obligá pa reportá tur aña na Nashonan Uni I komunidat internashonal riba bienestar di pueblo Boneriano.

Awor na momentu ku nos ta serka di e momentu históriko pa protehá pueblo di Boneiru na Nashonan Uni den lei internashonal i mekanismonan di derechonan humano, e mesun grupito, mesun bósnan diskréditá aki ta bolbe — atrobe pa trata di manipula o engañá un pueblo resiliente ku nunka a entrega. Pero e biaha aki, ta diferente.

Pueblo di Boneiru ta informá. E trampa ta konosí. E berdat ta kla kla. I e biaha aki, pueblo lo salba e pueblo.

FUENTE: JAMES FINIES