MAS I MAS TA YEGA SERKA SINDIKALISMO UN FENÓMENO NOBO PA LOKE TA RETIRO DI UN TRAHADÓ FOR DI UN KOMPANIA.

Kralendijk,- E tristesa ku ta presentá ta ku den mayoria kaso e trahadó no ta miembro di un sindikato i ta bisto ku su konosementu básiko di nos leinan laboral ta tiki te nada.

Mas tristu ta bira ku e trahadó ta bai tras di e dunado di trabou i ta firma su retiro sin sikiera buska konseho.

Meskos ku ora tuma un hende na trabou tin siero proseduranan ku mester sigui, manera traha un kontrato di trabou den kua ta pone tur e kondishonnan ku tur dos partido mester mantené nan mes na dje, asina tambe lei a preskribí kon ta e forma i proseduranan ora partidonan mester tuma despedida di otro.

Kon partidonan ta tuma despedida bou di un kontrato definí, esta mará na tempu.

Despues di tempo di prueba ku ta dos luna i ku mester ta por eskrito, kada un di e partidonan por konkluí ku nan no ta sigui ku otro.

Kòrda tempu di prueba mester ta akordá por eskrito. Si esaki no t’ei e karakter di e kontrato di trabou ta pa tempu indefiní i pues tin otro regla kon ta tuma o duna retiro.

Si tin un kontrato definí, esta a akordá ki dia ta kuminsá traha i ki dia ta stòp, ora e fecha di stòp yega, pa lei e kontrato ei a terminá.

No tin mester di antisipá(opzegging). Si dado kaso e dunadó di trabou laga e trahadó sigui traha despues ku e fecha a vense, esei ta nifiká ku ela alargá e kontrato den silensio i e kontrato ei tin un durashon di máksimo un aña mas.

 Ta bon pa splika ku si e kontrato di tempu definí dura 36 luna sigui òf a firma 3 kontrato definí tras di otro, e siguiente kontrato ta bira indefiní.

Kon partidonan ta tuma despedida bou di un kontrato indefiní, esta un kontrato fiho.

Pa e kontrato fiho tin algun forma pa tuma despedida di otro, nan ta entre otro

1. Fayesimentu di e trahadó
2. Ora e alkansá su edat di baha ku penshun for di e kompania.
3. Retiro ku argumentunan bálido i akordá pa ministerio di asuntunan Sosial i di Labor. Pues pa retirá e trahadó e dunadó mester pidi pèrmit serka SZW.
4. Retiro dor di disolvé e kontrato. Esaki ta bai via un kaso den korte. Ambos partido por pidi esaki. Hues ta evaluá i kaminda ta nesesario ta stipula un kompensashon hustu pa e trahadó.
5. Dor di “opzegging di e kontrato”. Pa e trahadó esaki ta den mayoria kaso un luna di antisipashon i pa e dunadó di trabou e por varia dependiendo di e kantidat di añanan di servisio di e trahadó, e por yega te ku 4 luna.
6. Dor di akuerdo mutuo entre partidonan. Dunadó di trabou i e trahadó ta negoshá e despedida i ta yega na un akuerdo ku pago di un kompensashon.
7. Retiro inmediato. Komo ku esaki ta e arma mas pisá, lei ta pone kondishonnan estrikto ki ora por duna un trahadó retiro den forma inmediato.

E motibunan menshoná bou di punto 3 te ku 7 ta importante pa e trahadó sa di nan i kaminda si e no ta komprondé, e por pidi asistensia i ayudo serka su sindikato.

Nos konseho ta semper no firma nada promé ku bo buksa konseho. Kòrda semper ku sindikato ta bo abogado, bo seguro, bo wantadó di sla.

Ta p’esei bo ta paga bo kontribushon mensualmente. Meskos ku mensualmente bo ta paga bo prima di seguro pa malesa òf pa bo outo of pa bo propiedatnan, meskos mensualmente bo ta paga sindikato bo kontribushon komo seguro pa e kuidabo, yudabo, asistibo, konsehabo i sostenebo den bo kondishonnan laboral.

I retiro di un trahadó ta forma parti di e kondishonnan laboral.

FUENTE: NÒCHI WILLEM/LIVE99FM