Redakshon
Kralendijk,- Presidente di Bonaire Human Rights Organization – I miembro di Muhernan Fuerte Boneiru, Sra Davika Bissessar Shaw, huntu ku lider di Pueblo Progresivo Uni Sr James Finies ta partisipá den e reunion di Komishon di e Status di e Muhé di Nashonan Uni dia 15 di Mei 2025 na Sede di Nashonan Uni na New York.
Su partisipashon ta un momento krusial pa amplia e bos di e muhé i mucha muhé margina na Boneiru riba e plataforma mundial.
E inisiativa aki di Bonaire Human Rights Organization ta un paso importante pa avansá e meta-nan di e Komishon di Muhe di Nashonnan Uni (CSW), a base di e “Pact for the Future 2024” ku Sra Davika Bissessar-Shaw a asistí anja pasa na New York i e legado di e Deklarashon di Beijing, spesialmente pa promové igualdat di género, empoderashon i derechonan di muhé i mucha muhé den tur sektor di komunidat Boneiriano.
BHRO kier pa pone na atenshon mundial e desafionan spesífiko i e violashonnan di derechonan humano ku muhérnan i mucha ta enfrentando na Boneiru.
Presidenta Bissessar lo uni ku lider-nan di estado-miembro di Komishon di Hende Muhe di Nashonan Uni, entidatnan di Nashonan Uni, NGO-nan i organisashon di sosiedat sivil di tur parti di mundu pa defende e derechonan di hende muhé, mucha i pueblo indígena.
Su partisipashon ta resalta e nesesidat urgente pa komunidatnan di islanan chiki pa wordu inkluí den diskushonnan global tokante igualdat di género, derechonan humano i desaroyo sostenibel.
Dor di trese e situashon di hende muhé i mucha di Boneiru dilanti, e ta spera pa kontribuí na politika ku ta mas inklusivo i hustu, ku ta reflehá e realidat di bida di e populashon vulnerabel i margina na Boneiru.
Bonaire Human Rights Organization ta keda firme den su misión pa defendé e derechonan i dignidat di tur hende di Boneiru, ku énfasis spesial riba esnan ku tin mas risiko di wordu ekskluí for di diskushonan internashonal.
Su presensia den e reunion di nivel haltu aki ta sirbi no solamente komo e bos di muhé i mucha Boneiriano, sino tambe komo un rekordatorio poderoso ku ningun komunidat – no importa kon chiki – no mester wordu lubidá. Bonaire Human Rights Organization ta hasi un yamada riba e komunidat internashonal pa skucha, partisipá i tuma akshon signifikativo pa sostené e derechonan di muhé Boneiriano.
E momentu aki no ta solamente tokante partisipashon – e ta tokante transformashon.
FUENTE: PRESIDENTE DI BONAIRE HUMAN RIGHTS ORGANIZATION
GIPHY App Key not set. Please check settings