KORSOU: BUSKA MAS SABÍ: POLIS TA SIGUI PISTANAN GEOGRÁFIKO DI KRIMINALNAN

Willemstad,-  Krimen ta laga pista geográfiko atras. Es ku wak bon, por mira un patronchi. Entre 28 di aprel i 9 di mei último, a tuma luga na Kòrsou e entrenamentu intensivo Geographic Profiling Analyst (GPA), pa sigui entrená polis kon pa detektá e pistanan aki.

E entrenamentu aki a keda organisá den kolaborashon entre Kuerpo Polisial di Kòrsou (KPC) i Kolegio di Hefenan di Polis di e kuater kuerponan den e parti Karibense den Reino. E entrenamentu di GPA aki a tuma lugá anteriormente na Sint Maarten i Aruba, i pronto lo ser duná na Boneiru.

Geographic Profiling ta un téknika di análisis spesialisá den área di geografia i análisis di krimen. Dor di analisá e lugánan kaminda delitunan a tuma luga, investigadónan por predesí unda e sospechosonan posibelmente ta, manera na nan kas, na trabou òf otro lugánan ku nan ta bishitá regularmente. Esaki ta duna polis e oportunidat pa yega mas lihé na e malhechornan deskonosí i tambe pa usa kapasidat investigativo di un forma mas dirigí.

Durante di e entrenamentu di GPA na Kòrsou, agentenan polisial a siña kon por uza análisis geográfiko pa hasi nan investigashonnan di krimen hopi mas dirigí. Ta trata di kombinamentu di informashon tokante di krimen ku datonan di sitio, pa por yega na puntonan di konekshon konkreto pa resolvé kasonan.

E meta prinsipal ta pa logra avanse mas lihé den investigashon, pa medio di uzo mas stratégiko di e informashon. E téknika aki ta keda apliká riba diferente tipo di krimen manera kiebro, atrako, delitunan moral, insendio i uso di violensia, pero ta mas balioso ainda den kasonan kaminda un solo malhechor òf gruponan di malhechor ta kometé vários krimen.

Bert Adriaens, e eksperto renombrá den área di Geographic Profiling ku hopi aña di eksperiensia tantu den práktika komo den formashon di profesonalnan, a duna e entrenamentu. Adriaens no solamente ta un Geographic Profiler kalifiká, pero tambe un dosente apashoná ku por tradusí su konosementu profundo den aplikashon konkreto den trabou investigativo.

E entrenamentu di GPA a kontribuí na un manera tangible na fortifikashon di e kapasidat investigativo i kombatimentu di krimen na Kòrsou i den region.

Pa medio di formashon di agentenan polisial den análisis di patronchinan geográfiko, investigashon por duna resultado mas lihé i ta spar tempu balioso.

Di e moda aki, e probabilidat pa kapturá malhechornan a bira mas grandi. Danki na e entrenamentu aki, Kòrsou a bira mas sigur – pero no pa esnan ku ta viola lei.

FUENTE: KOLEGIO DI HEFENAN DI POLIS/LIVE99FM