Redakshon
Oranjestad,- E siman aki a conoce dos bon noticia pa nos grandinan. E prome ta cu nos pensionadonan ya no mester paga pa remedi mas, un decision cu Gabinete Wever Croes a tuma 13 di december 2024.
Pa por a haci esaki mester a percura pa stabilisa y fortifica e situacion financiero di AZV. Despues di a hiba un maneho financiero responsabel, cu a hiba Aruba den surplus mientras cu a hered’e na borde di un bancarota, MEP a anuncia aña pasa cu lo introduci e exhoneracion di pago pa remedinan pa nos pensionadonan cual promesa MEP a cumpli cu ne december 2024. Desde 1 di mei nos pensionadonan no mester paga pa remedi mas.
E di dos bon noticia pa nos pensionadonan ta e AWG 250 adicional cu e pensionadonan a ricibi e luna aki. Esaki tabata posibel danki unicamente na e maneho financiero responsabel di Gabinete Wever Croes, lagando un surplus di 500 miyon florin den caha di Gobierno. Ta bon pa recorda cu tempo cu MEP a drenta Gobierno na 2017, a encontra solamente 50 miyon florin den caha cual no tabata yega ni pa paga salario di e ambtenaarnan.
Awe nos ta tende Lider di AVP, Mike Eman ta broma cu e no por a duna e 700 na nos pensionadonan pasobra cu presupuesto di Gabinete Wever Croes lo no ta dun’e espacio. Pa cuminsa Mike Eman a haci un promesa falso durante campaña cu ta wordo categorisa como KIEZERSBEDROG, gañamento di campaña. El a tira un mentira den laira sperando cu e lo pega cu e unico meta: gana eleccion. Despues cu el a bin realisa cu e no por cumpli cu e engaño aki, awe kier culpa MEP? Facil no? Sconde tras di MEP, cu ta otro mentira flagrante mas. Pero e modus operandi aki di Mike Eman nos conoce caba y p’esey nos ta expone su mentira pa pueblo haya sa e berdad.
MEP na un forma responsabel a aumenta pension durante Gabinete Wever Croes cu un total di 400 florin. Tempo cu MEP a drenta Gobierno na 2017, pension pa nos grandinan tabata meramente 950 florin. Awe nos por mira cu danki na Gabinete Wever Croes/MEP gradualmente a aumenta esaki pa tur pensionado sea soltero of casa.
Cu AVP por a duna nos pensionadonan e aumento di AWG 250 ta danki na e maneho responsabel di MEP. Pasobra si AVP a hereda un caha di gobierno bashi, manera cu MEP si a hereda di AVP, ni e 250 Mike Eman lo por a cumpli cu ne.
MEP ta sumamente orguyoso cu nos pueblo awe ainda, ta cosechando di e maneho financiero responsabel di nos gobierno cu a sa di rescata Aruba for di un posibel bancarota hereda di AVP, cu a pesar di e pandemia di COVID, a percura pa tur famia aki na Aruba por tabatin un entrada pa pone pan riba mesa. Y despues di tur esaki, a sa di saca Aruba for di un pandemia pa e pais nr 1 den region di recuperacion economico y financiero.
MEP ta sumamente orguyoso di e logro aki pasobra durante MEP, nos pais a conoce trankilidad, stabilidad y prosperidad.
FUENTE: PARTIDO MEP/LIVE99FM
GIPHY App Key not set. Please check settings