FORMA A ORGANISÁ UN TREMENDO SEMINARIO PA SU STUDIANTENAN.

Kralendijk,- Esaki ku yudansa i sosten di FORMA su Konseho di studiante. El a tumá lugá den dos sekshon repetitivo. Unu riba djaweps 3 di aprel último parti mainta i e di dos enkuentro riba djaweps 10 di aprel último parti anochi.

Di e manera aki, studiantenan por tabata presente i asina tin mihó partisipashon.

E tema di e seminario tabata Empoderá pa Progresá.

Durante di e seminario tabata tin dos oradó.

Sr. Vaughan Astwood, oradó inspirativo i coach. El a trese dilanti e importansia di biba den presente.

El a konsehá pa usa bo eksperensianan di pasado i e abilidatnan desaroyá komo un fuente di forsa den bo presente.

Tambe el a kompartí e fórmula di éksito, ku ta: Lucha + Deskanso = Éksito. El a konsehá ku ta importante pa kòrda repartí bo forsa i tuma pousa regular.

El a enfatisá ku si un hende ke ta eksitoso, e mester siña balansá bida di tal manera ku bo ta sobra tempu pa disfrutá huntu ku bo sernan kerí di e fruta di bo trabou.

Nos di dos oradó tabata sr dr Anthony Nicolaas. El a trata e tema di lei laboral na un manera general ku nos studiantenan. El a siña nos studiantenan tokante e definishon di akuerdo di trabou i e tipo di akuerdonan di trabou ku tin den islanan BES. Tambe el a elaborá tokante di e komponentenan di un akuerdo laboral. El a trata e parti di suèldu mínimo i trato igual na trabou.

Tambe e studiantenan a haña informashon tokante e posishon di un trahadó públiko. Por último e abogado a dediká tempu na splika tokante di e akuerdonan di un kontratista, trahadó independiente i akuerdo di OVO.

E studiantenan a eksperensiá e seminarionan akí komo super motivante i informativo.

FORMA ta gradisí e oradónan inmensamente.Tambe FORMA ke gradisí e miembronan di konseho di studiante Edgar Mejia, Norvelinne Elisabeth, Edelyn De Dios, Yeison Brand, i Alfonzo Castro pa a trese e idea dilanti i pa yuda den e ehekushon di e seminario.

Por último FORMA ta gradisí e studiantenan ku a partisipá na e seminario akí ku a tabata organisá spesialmente pa nan.

FUENTE: FORMA BONAIRE/LIVE99FM