NASHONAN UNI TA APLAUDI DELEGASHON BONERIANO PA EKSPONE OPRESHON HULANDES.

Kralendijk,- Den un momentu históriko pa e pueblo di Boneiru, James Finies, Lider di Pueblo Progresivo Uni, a lidera un delegashon di sosiedad sivíl na e sede di Nashonan Uni na New York— Pa prome biaha den historia di Boneiru un bishita manera esaki a tuma luga

Hunto ku Finies tabatin Davika Vicky Bissessar, Presidente di Bonaire Human Rights Organization, i lidernan prominente di e grupo Muhernan Fuerte di Pueblo Progresivo Uni: Phenice Frans-Piar i Joseline Thielman. Durante seis dia, e delegashon a partisipá den un seri di aktividatnan importante di Nashonan Uni,  eleva e bos di pueblo Boneriano na e plataforma internashonal i pone atenshon riba problemanan struktural ku ta afektá derechonan humano despues di 10-10-10.

Un di e tema prinsipal ku e delegashon a pone enfasis riba tabata e situashon preokupante den edukashon na Boneiru, kaminda ta impone I forsa Hulandés komo idioma di instrukshon ku a mina éksito di studiantenan. Mayoria di mucha ta lanta ku Papiamentu, i e barera linguístiko ta kontribuí na rendimento akadémiko bou di nivel, hopi “drop-outs”  i pone nos identidad kultural desminui i desaparesé.

“Esaki no ta solamente un asunto di idioma—esaki ta un asunto di derecho humano,” asina Davika Bissessar a bisa “Nos muchanan tin derecho humano pa siña den nan idioma materno i pa desaroya ku eksito sin elimina nan identidad i herensia kultural.”

E delegashon Boneriano a tene varios enkuentro importante ku figuranan haltu di Nashonan Uni.

Joseline Thielman a deklara: “Komo un mama i un polis ku 30 aña di servisio, mi ta sin poder pa protehá nos muchanan kontra diskriminashon i opreshon den skolnan kontrola pa Hulanda. Despues ku mi regresa Boneiru di NU, mi ta sintí ku mi ta haña fe bek den humanidat”

Phenice Frans-Piar, a denunsiá e sistema di edukashon ku Hulanda a impone komo un arma moderno di kolonisashon mental—I a demanda derecho di mayornan pa edulka nan yunan den espirito di nan herensia, identidat I libertat.

Un momentu históriko ku pa semper lo keda graba tabata durante e Asamblea General. Dr. June Soomer, Presidente saliente di e Foro Permanente riba Hendenan di Desedensia Afrikano a ekspresá publikamente na mundu kompletu su gratitut na e delegashon di Boneiru spesífikamente pa e trabounan importante ku nan ta hasiendo pa pueblo Boneriano i otro teritorionan kolonisá.

Su rekonesimentu ta un aprobashon poderoso di e preokupashonnan ku a wordu trese dilanti pa e delegashon Boneriano, i a pone énfasis riba e importansia global di  lucha Boneriano.

“E reunionan aki i e rekonesimentu ta prueba ku mundo awor ta skuchando,” James Finies a bisa riba e dia historiko aki ku ta marka nan di 755 dia den eksterior di mishon I lucha pa konsenshi internashonal.

“Nos a presenta e berdat di e lucha di Boneiru pa hustisia, dignidat, i autodeterminashon—i nos no lo para te ku e derechonan humano i dignidat di nos pueblo  wordu respetá.

”E bishita ta un momento markante pa e pueblo nativo di Boneiru i un yamada pa akshon na komunidat internashonal pa sostené derechonan di autodeterminashon, edukashonal i  kultural di e pueblo Boneriano.

FUENTE: BONAIRE HUMAN RIGHTS ORGANIZATION/LIVE99FM