NOS A BIN HUNTU I FORMA UN ASOSASHON DI KONSTRUKSHON PA SALI NA INTERESNAN DI E SEKTOR.

Kralendijk,- Nos a bin huntu pa por forma un bos fuerte i uní pa gobièrnu realisá ku e sektor aki ta representá alrededor di 12% di nos ekonomia.

Pues a bira tempu pa nos a uni forsa. Nos asosashon tin komo meta pa ta un partner den diskushonnan ku gobièrnu i otro instanshanan. Solamente dor di traha huntu, kompartí konosementu i representá interesnan komun, nos sektor por prepará pa retonan i oportunidatnan di mañan.

Palabranan ekspresá na lantamentu di Vereniging Bouwend Bonaire, abreviá VBB. Sindikalismo kier yama pabien i bonbiní na e Asosashon di Konstrukshon. Nos ta kontentu ku e diferente kompanianan a realisá e mesun motibu- i argumentunan pa uni forsa ku semper sindikalismo a usa komo base. Nan ta

1. Sali na interes di e sektor. Serka nan ta e sektor di konstrukshon miéntras serka sindikalismo esei ta e sektor labora lkompleto.
2. E balor agregá di e sektor pa nos ekonomia. Sektor di konstrukshon ta forma 12% di nos ekonomia, miéntras e sektor laboral ta 100% ko-kargadó i partísipante den nos ekonomia.
3. Ta papia ku un bos fuerte i uní. Den sindikalismo ta esei ta nos forsa.
4. Ser un partner igual pa ta den diálogo ku gobièrnu i otro instanshan manera entre otro sindikalismo komo representashon di e klase trahadó. Ta den e diálogo ei nos ta siña traha huntu, kompartí konosementu i representá interesnan komun i prepará pa retonan i oportunidatnan di mañan. Sindikalismo ta ko-fundador di e plataforma tripartit formá pa gobièrnu, empresarionan i sektor laboral i kual ta basá riba e prinsipio di igualdat i rèspèt mutuo.

Nos a tuma nota ku te ainda ta 12 kompania di e sektor a lanta e asosashon. Seguramente e intenshon ta pa e otronan ku ainda no ta miembro, bira miembro i ku e asosashon aki lo afiliá su mes na Buisines Federation Bonaire, BFB, e mama di tur organisashon di dunadónan di trabou i bira parti integral den e plataforma tripartit ku ta Diálogo Sentral.

Si dunadónan di trabou ta uni forsa pa sali na nan interes, esaki mester ta un ehèmpel, un estímulo pa trahadónan tambe uni pa sali i defendé nan interes. Si interesnan di empresanan ta pa haña máksimo rendimentu di nan invershon(kapital), pues hasi ganashi pa garantisá eksistensia i kontinuidat di nan empresa, sindikalismo ta e union laboral ku ta sali na interes di e klase trahadó. I e interes di e klase trahadó ta pa haña máksimo rendimentu di su invershon(labor, konosementu i abilidat)i garantisá seguridat di trabou.

Pues risibí pago husto pa su trabou, disfrutá di kondishon- i sirkumstansianan laboral,  ser balorá i haña e rèspèt meresí. Pues un yamada di kurason na tur trahadó den e sektor di konstrukshon ta pa nan afiliá na un sindikato i asina mas lihé posibel sindikato por haña rekonosimentu komo representante i sinta na mesa i negoshá kondishon- i sirkumstanshanan laboral. Mi kier kompartí ku e trahadónan den e sektor di konstrukshon lo siguiente.

Mi ta un trahadó afiliá na un sindikato. Esaki kier men ku mi ta parti di un organisashon ku no solamente ta lucha pa mi benefisio sino pa benefisio di tur trahadó.Ta sindikalismo ta pone e kondishonnan básiko. Huntu nos por i lo logré.

I pa dia di labor próksimo mi kier sita Nelson Mandela; “ Mi a siña ku kurashi no ta ousensia di miedu, pero ta e triunfo i viktoria riba miedu. E hòmber i muhé balente no ta esun ku ta bisa mi no tin miedu, sino esun ku ta konkistá i ser viktorioso riba miedu i sali dilanti.” I ta e trahadónan balente aki nos ta bai konmemorá in rekordá dia 1 di mei awor. Ta nan uní den sindikato a lucha i ketu bai ta lucha pa logronan di e klase trahadó i su famia.

FUENTE: NÒCHI WILLEM/LIVE99FM