KOMO DOSENTE DI ISTORIA NA SGB (1982- 2000) E LÈSNAN TABATA BAI NA HULANDES MI NO A SPLIKA KONSEPTONAN DIFÍSIL NA PAPIAMENTU.

Kralendijk,- Konsientemente tabata manda e alumnonan buska e nifikashon i splikashon den dikshonario hulandes i bishitá biblioteka unda tin ensiklopedia. Enseñansa no ta gana nada ku pelea di idioma Papiamentu komo idioma di instrukshon òf Papiamentu komo material òf  pelea  entre maneho di skol i Konseho di mayor.

Enseñansa ta tokante,  ki desaroyo eskolar ta enserá, kon ta atkerí konosementu I abilidat I ki ròl idioma I lesamentu ta hunga den e proseso largu di siñamentu. Tin artíkulo di Drs Juana Kibbelaar ku mi ta rekomendá tur ku ke debatí seriamente riba idioma i enseñansa mester lesa. Mester debatí riba e tópiko enseñansa.

Punto di salida tokante idioma no mester ta, den kua idioma ta duna lès, ma ki enseñansa ta nifiká pa e mucha.  Na Bonaire hulandes ta e idioma prinsipal den enseñansa i lo mester ta sufisiente pa kontinuá ku un estudio na Hulanda riba nivel di HBO i Universitario. Mi pregunta ta ku si e base di hulandes ta fuerte pa sigui   un estudio mas avansá despues di Mavo, Havo i Vwo. 

Sigur e inisiativa pa ataká e problema ku 51 % di e poblashon profeshonal ta funshoná bou di e nivel di kualifikashon deseá ta nesesario. Ta importante pa sa ku si den e porsentahe aki tambe tin e esnan den maneho i no solamente esnan den ehekushon.Si esei no ta e kaso nos ta keda na kambio i no na mehoransa.  

Ami ta sigui mira e nesesidat pa Bonaire tin, pa kuminsá un HBO ku dosentenan kapasitá pa duna enseñansa na alumnonan i sigui ku kapasitashon di; direktornan, maestro i dosentenan, gezaghèbernan, konsehalnan, abogadonan, médikonan, sikólogo i sikiaternan, lidernan sindikal, prensa, lider i dirigentenan di deporte.

E promé stap ta serka diputado Nina  pa traha un vishon di enseñansa ku ayudo di ekspertonan akadémiko strañero pa presentá Hulanda un plan konkreto pa realisá e nesesidat di un HBO na Bonaire.

E meta mester ta un meta nobo  pa mehorá nos enseñansa ku ta kuadra ku Bonaire, un komunidat chikitu,  su nesesidatnan. Aunke mi no ta duna lès, tòg mi ta sigui kurso di historia.   

FUENTE: ARTHUR SEALY/LIVE99FM