DIPUTADO CICILIA TA LABA MAN FOI PISKADÓNAN!!

Kralendijk,-Den kurso di siman ku a transkuri, Piskadonan ku tin nan bótonan mara na waf di piskadó na Playa, a hasi un jamada urgente riba diputado Cicilia, pa e bin na e sitio pa tuma nota di e situashon deplorabel di e waf di piskadó.

E piskadónan presente a mustra diputado e situashon horibel di e pianan di e waf ku ta severamente oksida i ku ta na punto di laga bai. Di otro banda nan a indíka ku e latanan ku ta forma e parti ariba di e waf ta tur kibra i ku te asta diferente di nan ja a putri i kaba na nada.

Na diferente luga riba e waf, por mira ku piskadó’nan mes a lapi burakunan eksistente riba e waf ku ‘marine plywood’, pa asina nan por pasa i jega nan nan boto. Un situashon sumamente peligroso.  Na final di e enkuentro ku diputado Cicilia Piskadónan a úrgi e diputado pa e hasi su máksimo esfuerso pa solushoná e situashon penibel di e waf aki ku  gobiernunan anterior a laga traha espesialmente pa Piskadónan por mara nan botonan den kwa nan ta sali pa laman tur dia pa por jega na nan pan di kada dia i asina kwida nan famia i subastese merkado lokal ku piska i otro frutanan di laman.

Diputado despues di a priminti Piskadónan ku e lo bai solushona e kaso aki, a bandona e sitio lagando Piskadónan ku e speransa ku diputado Cicilia lo kumpli ku su palabra i solushoná e situashon aki ku no solamente ta unu bergonsóso pero tambe peligróso.

Bergonsóso pasobra nos no mester lubida ku salí for di e punto di bista históriko, pískeria ta un di e profeshonan tradishonal/kultural mas antiguo ku Boneiru konosé-, i ku te asta e Boneriano ta karga e apodo di ta hombernan di laman.

Grandi tabata e sorpresa pa Piskadónan ku ora ku nan a jega waf di Piskadó dia despues, nan a wordu konfronta ku e solushon ku diputado Cicilia a trese. Esta di laga pone dos borchi na entrada di e waf, ku ta bisa tekstualmente; “betreden op eigen risiko” of na bon papiamentu subi riba bo propio risiko.

E piskadónan pues a haña un bofta den nan kara di parti di diputado Cicilia kende a bisanan kara seku seku; ‘subi e waf riba boso propio kwenta’ i si algu pasa ami (lesa gobiernu), no ta responsabel.

Asina aki si nos no a mira nunka. Un diputado ku ta representa un Partido di ásignatura sosial demokrata, ku pa tradishon tin un base signikativo bow di piskadónan, por a jega na un pensamentu laf i kobarde asina. Un diputado ku ta mustra mas i mas ku e no tin ku nes kiko pasa ku Piskadónan, basta e kwida su pelejo.

Nos ta spera sinseramente ku e komunikado aki por juda pa Diputado Cicilia por rékapasita i jega na e formula pa solushoná e situashon eksistente di waf di Piskadó, basa riba un maneho general ku lo sirbi pa trese un automatismo den trabownan di mantenshon di ínfrastruktura pa loke ta trata piskadónan.

Nos di nos banda lo sigi vigila e situashon aki di aserka i lo hasi nos máksimo pa óbliga diputado Cicilia na kúmplimento ku e Piskadónan.

FUENTE: JAMES KROON MIEMBRO DI KONSEHO INSULAR PA UPB.