ULTIMO DIANAN MAS I MAS HENDE TA ASERKA MI PA E FALTA DI BON GOBERNASHON KU TIN NA BONEIRU.

Kralendijk,- Hopi ta esnan ku ta insisti ku UPB mester hasi oposishon mas fuerte i tumba gobiernu. Ounke ku ami tambe ta di opinion ku gobernashon ta na werki aki na Boneiru i ku mal gobernashon ta na orden di dia, mi no ta akuerdo ku mester inbolbi oposishon den e desaster aki.

Resultado di elekshon di mart 2023 tabata Democrat 3 asiento, UPB 3 asiento, MPB 2 asiento i M21 a haña 1 asiento. Pues Democrat (PDB) no a haña 5 asiento pa pone tres Diputado den Bestuurscollege.

Ta un miembro di MPB a sali for di MPB, forma huntu ku M21 i Democrat un mayoria den Konseho Insular pa despues por a pone Clark Abraham, Nina den Heyer i Angelica Cicilia komo Diputado. Esaki ta nifika ku ta M21 i e miembro independiente tin e gobiernu aktual den nan poder. Tur loke ku pasa den gobiernu ta ku bendishon di e dos miembronan aki pasobra Democrat riba su so, ku tres asiento, no por goberna.

Pues tanten ku e dos miembronan aki ta sostene e gobiernu, ta nifika ku nan dos ta di opinion ku gobiernu ta bayendo bon. Hopi ta esnan den pueblo ku ta di opinion ku gobiernu no ta funkshona bon. Pero nos tin di kompronde ku ta 5 miembro di Konseho Insular ta disidi si e gobiernu aki ta bon pa pueblo of ku e ta malu. Partikularmente ta e dos miembronan ku a uni ku e tres miembronan di Democrat ta disidi pa nos komo pueblo, ku si e gobiernu ta funkshona, si of no.

Diputado Clark Abraham ta haña hopi kritika pa su forma di goberna pero no ta Diputado Clark Abraham ta disidi ku e ta keda komo Diputado si of no. Ta e e sosten di 5 miembro di Konseho Insular ta mantene i sostene e maneho di Diputado Clark Abraham. Nos tur sa ku Diputado Clark Abraham tin su propio manera di goberna.

No t’awe nos konose Diputado Clark Abraham. Semper Clark Abraham tabatin su propio pensamentunan alternativo pa ku gobernashon di nos isla. Clark Abraham no ta bai kambia su pensamentunan, ni su forma di goberna. Ta keda na e 5 miembronan di Konseho Insular pa sostene of stop di sostene Diputado Clark Abraham.

Partikularmente, ta keda na e dos miembronan di Konseho Insular ariba menshonan pa sigui of stop di sostene maneho di Clark Abraham. No lubida ku ta sin sosten di pueblo a krea e gobernashon aktual, pueblo ningun ora so a vota pa e gobernashon aki.

FUENTE: JAMES KROON MIEMBRO DI KONSEHO INSULAR PA UPB.