KANDELA NA LANDFILL I MOROTIN.

Kralendijk,- Alrededor di 3:20 a drenta notifikashon dor di personal di seguridat na Landfill, ku a surgi un kandela na e parti nobo di depósito di sushi, situá na parti nort di Afvalcentrum Lagun.

Mesora outoridatnan kompetente a keda notifiká i nan tabata presente na Landfill, pa asina tuma nota di e situashon. Aktualmente e situashon ta bou di kontrol, ounke ku tin hopi molèster di huma.

Esaki ta debí na e tipo di sushi manera sushi doméstiko i tambe sushi gròf ku tin den e área. Selibon N.V. ta den kontakto konstante ku kuerpo di bombero, kuerpo polisial i Entidat Públiko di Boneiru pa tene nan informá di e situashon. Miéntras tantu ku tabata trahando duru riba e kandela na Afvalcentrum Lagun, a drenta notifikashon ku a surgi un kandela chikí na Morotin na Rincon.

Esaki mesora a keda kontrolá i a wòrdu pagá. Ta trahando duru aktualmente pa minimalisá e molèster di huma na Lagun. Selibon N.V. ta trahando duru pa solushoná esaki i ku pa mañan nos fasilidatnan por habri atrobe pa públiko. Miéntras tantu Afvalcentrum Lagun i Morotin na Rincon ta keda será pa públiko durante di dia di awe.

Nos ta pidi pueblo di Boneiru ku ke depositá sushi na Landfill, pa tene un tiki pasenshi i ku pa mañan nan por hasi uzo di nos fasilidatnan atrobe. E situashon aki, no ta bai tin impakto den rekohementu di sushi den barionan ku ta programá pa awe.

Selibon N.V. ta asentuá un biaha mas ku nos ta tuma e kandelanan aki hopi na serio. Nos ta hasi un súplika un biaha mas na outoridatnan kompetente pa konhuntamente nos yega na un solushon pa ku e situashon aki.

FUENTE: SELIBON/LIVE99FM