DÒBEL KASTIGU

Kralendijk,- Ora un imigrante ta sali for di Boneiru via di airport, e tin ku tene kuenta ku e por haña un but (‘multa’ na Spañó), si su estadia legal a vense.

Pa kada dia di estadia ilegal na Boneiru, e tin ku paga un sierto suma di but. Pa estadia ilegal di un aña e but aki por subi te alrededor di $ 850.- (e montante presis nos no tin na e momentu aki). E imigrante por paga e but boluntariamente na airport mes. Si e ta disidí di paga, e ora ei e kaso lo no wòrdu mandá Korte. Si e NO ta paga e but, e kaso lo wòrdu mandá Korte pa Korte determiná e montante di e but.

Korda, e imigrante ta liber di skohe, sea paga of keda sin paga e but.

E but riba su mes ta legal. No por tuma Kmar na malu si nan ta hasi nan trabou y ta duna e imigrante e but aki pa estadia ilegal. Fundashon ‘Union di Imigrantenan Boneriano’ (FUIB) no tin problema ku esei tampoko. Mester respetá lei. Pero ariba e but, e imigrante tambe ta haña un segundo ‘kastigu’. Esaki ta e asina yamá ’inreisverbod’ pa 2 of 3 aña. Kier men, e imigrante no mag drenta Boneiru bèk pa (en general) 2 of 3 aña (of mas). Atrobe, esaki tambe ta pará den lei. Pues di punto di bista hurídiko FUIB no por protestá.

Sin embargo, FUIB ta di opinion ku e segundo kastigu aki (ku ofisialmente yama un ‘medida’) no ta humano. Y pa gobièrnu mes no ta prudente pa duna e segundo kastigu of ‘medida’ aki tampoko. Pasobra si e imigrante ta disidí di NO paga e but, e ta keda ku su sèn.

Oké, e no mag drenta Boneiru bèk, pero sikiera e tin su sèn. E por yega su pais y yuda su famia. Pero si e ta paga e but, e ta pèrdè su sèn. Anto riba dje e ta haña e medida di ‘inreisverbod’ anyhow tambe.

Pues dikon paga e but? No tin sentido. Ta p’esei FUIB ta rekomendá gobièrnu pa NO duna esnan ku ta paga e but un ‘inreisverbod’. Pasobra si e imigrante ta haña un inreisverbod anyhow, sea e ta paga of nò, mihó e keda sin paga e but. Sikiera e ta keda ku su sèn.

Kualkier imigrante ku ta deseá di haña mas informashon presiso over di esaki of otro problema hurídiko por tuma kontakto ku Direktiva di FUIB of pasa libremente na nos Konsultorio hurídiko grátis tur djasabra di 4’or te 6’or di atardi na Ofisina di Abog. Bijkerk na Antriol. Adrès: Kaya Jose G. Hernandez 16A. Telefòn y whatsapp: 796 2650.

FUENTE: FUIB/ABOG. M. BIJKERK/LIVE99FM