UN BERGUENSA NASHONAL: E HUMILIASHON DI RIGINALD ‘EL GRAN TIRI’ TRINIDAD

Kralendijk,- Loke a pasa ku Riginald ‘El Gran Tiri’ Trinidad no ta simplemente falta di respet, sino un ultrajo imperdonabel. UNTAHF a faya di un manera skandaloso ku un di Boneiru su íkono nan kultural mas grandi, un hende ku a dediká su bida na músika i karnaval, i ku a karga e nòmber di nos isla semper na haltu.

El Gran Tiri, e indiskutibel “Tata di Tumba” Boneireriano, a meresé un homenahe digno di su legado, pero loke e a risibí tabata un búrla. E organisashon di Festival di Tumba a mustra un inkompetensia bochornoso, tratando un hende grandi den músika manera si e tabata un persona kualkier, sin duna e respet ni e lugá ku e meresé.

For di 8 di yanüari, ora nan a inform’e di un manera improvisá ku e festival ta dediká na dje, te 15 di febrüari, ora un persona di organisashon ta yama El Gran Tiri un dia anterior pa informe ku e tin ku ta presente na Festival di Tumba. Ningun hende di organisashon a aserka El gran Tiri na su kas pa por entreviste pa sa mas di su bida i kiko Karnaval i Festival di Tumba realmente a nifika p’e of sikiera saka un potret ku ne.

I ta esaki nan ta e kos nan ku ta deskurasha artista nan hoben ku kier partisipa ku lo tin ku tuma e batuta pa sigui ku nos Festival di Tumba i Karnaval. Berdaderamente loke a pasa ta un falta di respet grandi. Un persona manera EL Gran Tiri ku su trayektoria no por ta keda trata asina. Ta e mes motibu nan aki ku El Gran Tiri no a presenta riba podium e anochi di Festival di Tumba pa risibi homenahe. Pero loke ta hopi mas peor no ta e desorganisashon, sino e humiliashon. I pa korona obra di despresio, e organisashon ta duna algun paresido na un “plaka konmemorativo” ku ni siquiera su nòmber tabata skibí korekto. Esaki no ta un homenahe, esaki ta un bofta den kara di un hende ku a hasi mas pa e kultura di Boneiru.

E komunidat ta rabia, i ku rason. Dikon Boneiru semper ta minimisá nos mes heroenan. Ta di kompronde ku talves Boneiru no por hasi e homenage ku tur e premio nan grandi ku nos hermana isla Korsou ta hasi paso nos Karnabal no ta grandi, pero hamas i nunka nos mester hasi algu ku ta keda kataloga komomalgu mediocre. Mientrastantu nos hermana isla nan ta rekonosé e grandesa di nan artistanan, Nos ta kopiá kos di Kòrsou tur tempu, pero ora ku ta algu berdaderamente importante, manera honra un figura kultural, nos no por sigui nan ehemplo.

Mira kon Kòrsou a rekonosé Elia Isenia: ku respet, ku un seremonia digno, ku regalonan di balor i ku un trato akuerdo ku su legado. Nan a rendele un homenahe manera e meresé, ku rekuerdonan importante, detayanan ku ta mustra su inpacto den kultura i regalonan di gran balor ku ta reflehá su importansia históshiko.

Esaki no por repití. Si nos ta bai rekonosé nos leyendanan, nos mester hasi esaki ku grandesa, ku seriedat i ku e dignidat ku nan meresé. E daño ta hasi kaba, e bergwensa ta ekspuesto, pero loke nos si por hasi ta exigi ku nunka mas un artista, un íkono, un heroe kultural ta wordu trata di e forma aki. Boneiru mester siña balorá su propio hendenan.

Nos ta un Pueblo humilde pero nos no ta kiko ku ta ni ken ku ta. Komo organisashon lo bon pa despues ku El Gran Tirin no a haña e homenage ku e merese manera tabata e inteshon e haña sikiera un DEPENSA NASHONAL di e forma kon e homenahe a bai.

FUENTE: LIVE99FM