KÒRSOU: CFT: “ATENDÉ E PROBLEMANAN DI SERVISIO DI IMPUESTO DI KÒRSOU”

Willemstad – Den kòmbersashonnan resien ku Gobièrnu di Kòrsou, Kolegio di supervishon finansiero Kòrsou i Sint Maarten (Cft) a insistí ku mester atendé e problemanan serka Servisio di Impuesto di Kòrsou mas pronto posibel.

For di 2021, e ingresonan di impuesto ta mustra un oumento, entre otro pa motibu di e medidanan di compliance ku ta tuma for di e tempu ei. Sinembargo, tambe tin problemanan persistente. Un Servisio di Impuesto profeshonal i honesto ta di importansia krusial pa por mantené e resultadonan positivo.

For di e dia ku el a asumí su kargo, na 2021, Minister di Finansas di Kòrsou ta traha riba mehorashon di e compliance tributario. Durante bishitanan na Servisio di Impuesto i Stichting Belastingaccountantsbureau, Cft a kòmbersá tokante di e akshonnan di mehora den e marko di e trayekto aki.

Apesar ku a logra resultadonan positivo, mas profeshonalisashon di Servisio di Impuesto ta nesesario pa mantené i ekspandé e resultadonan aki.

Reorganisashon Servisio di Impuesto

Na 2024, investigashon di Stichting Overheidsaccountantsbureau a demostrá ku den e implementashon di legislashon tributario, tabata tin kasonan di tratamentu preferensial indebido di parti di Ontvanger. Ademas a konstatá ku no ta kumpliendo ku e markonan legal.

Esaki ta afektá e konfiansa den Servisio di Impuesto, i ademas e ta trese riesgonan pa e disponibilidat di paga impuesto. Tin plannan avansá pa reorganisá i modernisá Servisio di Impuesto. Cft a urgi Konseho di Minister pa priorisá e reorganisashon aki mas tantu posibel, pasobra un Servisio di Impuesto honesto i transparente ta kontribuí na e salú finansiero di Kòrsou. Den e marko aki, Cft tambe a pidi atenshon pa e reforma di e sistema tributario.

Akinan tambe tin oportunidatnan pa mehorá compliance, i di e manera ei, oumentá e ingresonan. Asina ta krea posibilidatnan pa por baha e preshon tributario haltu na Kòrsou.

Presupuesto 2025

Kòrsou ta presentá surplusnan presupuestario multianual, prinsipalmente pa motibu di e oumento den e ingresonan di impuesto.

E pais tambe ta hasiendo progreso den e otorgamentu di lisensianan na proveedónan di weganan di azar online. Di e manera aki ta krea espasio pa implementá reformanan sumamente antisipá, por ehèmpel den kuido i seguridat sosial.

E reformanan aki lo benefisiá tur siudadano di Kòrsou. Den e marko aki, Cft tambe a pidi atenshon pa e elaborashon mas detayá di e solushon pa e problemátika finansiero di Curaçao Medical Center.

FUENTE: CFT/LIVE99FM