MAL SERVISIO NA OFISINA DI IMIGRASHON (IND).

Kralendijk,- Tantu di parti di imigrantenan Hulandes komo di imigrantenan di otro pais, nos ta tende regularmente ku e servisio di IND ta hopi malu.

Esnan ku a entregá un petishon mester warda hopi tempu promé ku nan ta haña kontesta riba nan petishon. Seis luna of mas ta ‘normal’.

Nos a tende un keho kaminda un imigrante mester a pasa tres biaha na IND pa e haña su permit, mientras ta IND mes a yam’é bis’é ku su permit ta kla. E di tres biaha, e persona aki  a pèrdè su pasenshi y a reklamá. Anto e ora ei, e persona na bali a saka e imigrante su permit for di bou di un stapel haltu di papel. Ku otro palabra, e permit tabat’ei kaba, probablemente for di e promé biaha ku e imigrante a pasa busk’é. 

Hende semper por hasi eror y no mester reklamá mesora. Respetá e amtenar y warda ku pasenshi. Pero si nos ta tende e tipo di kehonan aki frekuentamente, ta hustifiká pa konkluí ku e servisio ta malu. Nos lo kuminsá hasi investigashon y lo bini bèk riba e punto aki.

Tambe nos ta tende ku imigrantenan mester pasa trempan na IND pa saka number.

No ta problema pa warda bo beurt, pero si bo mester akudí na IND for di 6’or di mainta (of mas trempan) pa bo haña bo number (si nò, bo no ta wòrdu yudá), e ora ei esei ta otro ehèmpel di mal servisio. Den pasado a reklamá e asuntu di saka number di e manera aki, anto IND a introdusí un sistema mas mihó. Pero, aparentemente e sistema malu di antes a bini bèk.

Aki tambe nos lo investigá y elaborá riba e punto aki den futuro.

Nos imigrantenan ta hende. Nan meresé rèspèt y un bon trato. Nan ta traha duru pa progreso di Boneiru. Y IND mester laga nan sinti ku nan ta bon biní. Di otro banda, imigrantenan mester respetá nos kultura, kustumbernan y nos idioma(nan).

Tur djasabra Fundashon ‘Union di Imigrantenan Boneriano’ (FUIB) tin un konsultorio hurídiko grátis di 4’or te 6’or di atardi na Ofisina di Abog. Bijkerk na Antriol. Adrès: Kaya Jose G. Hernandez 16A.

 FUENTE: FUIB M. BIJKERK/LIVE99FM