BBBO KE BAI KARNAVAL

Kralendijk,- Festival di tumba a pasa i fin di siman aki ta parada di karnaval. Agrupashon musikal BBBO a partisipá den festival di tumba i nan tin masha gana pa toka spesialmente pa e muchanan.

Tantu e músikonan i e muchanan ku a kanta, a hasi hopi esfuerso i e kaminda pa nan por presentá den karnaval ta skur. Nan ta mira e balor den esaki i e ta un motivashon pa kontinuashon, pa sigui den 2026. Nan partisipashon den karnaval e aña aki, ta krea mas smak pa sigui. Tin hende ku ya a demotivá pero si nan haña e oportunidat pa presentá, esei ta trese alegria pa un i tur.

E situashon ta, e muchanan tin hopi gana pa kanta durante marcha di karnaval, pero e fondo finansiero no ta sufisiente pa karga esaki. A papia ku UNTAHF i nan a haña komprondé ku solamente un banda, esta agrupashon musikal Rio ku e tumba ganadó so ta bai karnaval.

BBBO ta deseá pa haña koperashon pa nan logra toka durante marcha di mucha wikènt binidero. Tin grupo di karnaval ku ta deseá pa e banda toka pa nan, pero nan no tin e fondo pa kubri tur gastu. Esnan ku ta deseá por tuma kontakto ku miembronan di BBBO na number di telefòn  7961086. Nan ta spera di haña reakshon spesialmente pa alegrá e muchanan, pa nan pasa un momentu agradabel wikent binidero.    

FUENTE: FITTIPALDI PIETERSZ/LIVE99FM