MICHAEL PIETERS A FAYESÉ I UN DI SU PARTINAN FUERTE TABATA DOMINIO DI TANTU HULANDES KOMO PAPIAMENTU SPESIAL DICHO I PROVERBIONAN.

Kralendijk,- Papiamentu tin diferente dicho. Mi ta usa solamente dos. “Kangreu di Hulanda su bunitesa ta despues di su morto”  loke ta nifiká ; despues di un persona su morto no tin palabra pa splika kon bon e tabata.

E otro ta “Kuantu dia di morto di Kèkè ku Dèdè a bisti rou “ loke ta nifiká hende ta lubidá mashá lihé loke otro a hasi pa nan. Mi a konosé Michael hopi di aserka tempu ku el a tou mi hiba Ecuador pa un gira di un siman. Michael a demostrá kon duna guia na un grupo na un manera plasentero. Tur anochi nos tabata hiba kòmbersashon riba  e tópikonan; libertat, responsabilidat, hustisia sosial i forsa di diversidat den komunidat boneriano. Michael tabata un humanista ku tabata ke pa hende invertí den su mes, famia, bario, organisashon, pueblo i yuda esnan ku ta den nesesidat ku e meta ; Bonaire, un dushi lugá pa biba. Michael a stima Bonaire, un stimashon ku a konosé rosa pero tambe sumpiña. Pero e palabranan; renkor i renkoroso no ta den dikshonario di un humanista.Gradisido di a konosé Famia Pieters.

FUENTE: ARTHUR SEALY/LIVE99FM