PERSEKUSHON A KONDUSÍ NA DETENSHON DI MENOR DI EDAT.

NOTISIA DI POLIS DI DJÁRASON 12 DI FEBRÜARI TE KU DJABIÈRNÈ 14 DI FEBRÜARI 2025

Detenshon pa estorbo di órden públiko

Djabièrnè 14 di febrüari, alrededor di 12.25 or di mardugá, a detené un hòmber di inisial A.v.W. di 39 aña di edat na Kaya Internashonal pa estorbo di órden públiko. A detené e sospechoso despues di vários notifikashon riba e mesun anochi na diferente sitio. Ta investigando e kaso.

Outo a pasa riba hòmber

Djaweps 13 di febrüari, alrededor di 9.50 or di mainta, ‘meldkamer’ sentral a risibí notifikashon tokante un insidente riba Bulevar Gobernador N. Debrot. Na yegada di polis, ambulans ya tabata na e sitio. Despues di investigashon a resultá ku un hòmber a kai ora e tabata baha for di su pikòp miéntras e vehíkulo tabata kore ainda, motibu pa kua esaki a kore pasa parsialmente riba dje. A hiba e víktima hòspital pa tratamentu médiko. 

Aksidente entre outo i siklista

Djaweps, 13 di febrüari, alrededor di 7.35 di mainta, un aksidente entre un outo i un ‘fatbike’ a tuma lugá riba Kaya Nikiboko Sùit. Na momentu ku polis a yega, a topa ku e outo mei mei di kaminda i un ‘fatbike’ tabata benta riba suela dilanti di e outo. Shofùr di e outo a deklará ku e tabata manehá riba Kaya Nikiboko Sùit i kier a kita na su man robes pa drenta Kaya Vibrafon. Solo a blèndu e i no a mira e siklista yega serka, despues di kual el a tende un klap. E siklista a keda herida i personal di ambulans  atendé na e sitio pa. E víktima no mester a bai hospital. Konforme e maneho di ‘botsen is blazen’ a hasi un tèst di supla ku un resultado negativo. El a haña un but pa manehá  sin reibeweis i sin seguro.

Persekushon a kondusí na detenshon di menor di edat

Durante oranan di mardugá di djaweps, 13 di febrüari, alrededor di 2.25 or, a detené un hóben di 15 aña di inisialnan J.E.S.s.J. na Kaminda Tras di Montaña despues ku e sospechoso no a duna oido na òrdu di polis.

Un patruya riba Kaya Sonmontuno a mira un outo (vehíkulo 1) drenta sitio di stashoná di un tereno di futbòl ku velosidat haltu. Esaki a pone ku e agentenan tambe a kore drenta e lugá di stashoná. E agentenan a opservá vehíkulo 1 stashoná banda di un otro outo (vehíkulo 2). Ora ku nan a mira polis, vehíkulo 1 a bek i kore bai. E agentenan a mira ku vehíkulo 2 tambe tabata bek riba ku velosidat haltu, a slep te te ora el a para ketu pero e tayernan patras a sigui drai. E vehíkulo a sali for di e sitio di stashoná ku velosidat haltu i sin lus sende. E agentenan a disidí di bai tras di vehíkulo 2. Dor ku e vehíkulo tabata move ku velosidat i e lusnan di e outo tabata paga, e agentenan a duna e shofùr señal pa stòp usando ‘zwaailicht’. E shofùr a oumentá su velosidat. Den e bario Amboina, e agentenan a ordená e shofùr pa stòp repetidamente dor di pita i aktivá e sirena, pero e shofùr a ignorá nan i a sigui kore.

Esaki a kondusí na un persekushon den vários kaya. E vehíkulo sospechoso tabata kore mas ku e velosidat permití. Na dado momentu, un di dos vehíkulo di polis tambe a djòin e persekushon. Riba Kaya Korona, e agentenan a purba pasa e vehíkulo vários biaha pa para e vehíkulo, pero e shofùr a kòrta e vehíkulo polisial vários biaha i a sigui wela di un banda di kaminda pa e otro. E agentenan tambe mester a wela vários biaha pa evitá un choke pasobra e shofùr di e outo sospechoso tabata primi brek vários biaha. E komportashon di stür i kòrta e vehíkulo di polis tambe a krea un situashon peligroso. Riba Kaminda Tras di Montaña e agentenan a logra blòkia e vehíkulo. Diripiente e shofùr a wanta brek i a bin para, kousando ku e di dos vehíkulo di polis a dal den e bùmper patras di e vehíkulo sospechoso. A detené e shofùr, ku ta menor di edat,  pa falta di kumpli ku òrdu di polis, pa kousa peliger riba kaminda, manehá sin lus i sin reibeweis. Un mucha muhé di 14 aña tambe tabata den e vehíkulo komo pasahero huntu ku e sospechoso. A hiba ámbos warda. A resultá ku e shofùr menor di edat a bai ku outo di su mayornan sin pèrmit. A pone e mayornan di ámbos na altura di e situashon.

Detenshon pa maltrato i destrukshon

Djárason 12 di febrüari, alrededor di 6 or di atardi, a detené un hòmber di inisial R.G.R.S. di 21 aña di edat na un establesimentu di hóreka na Kaya J.N.E. Craane pa maltrato i destrukshon. Ta investigando e kaso.

Ladronisia for di vehíkulo

Djárason 12 di febrüari a drenta keho di ladronisia for di un outo na Altamira Unjo den Rincon. Miéntras e okupantenan a baha for di e outo, deskonosínan a bai ku un tenedó di tarheta, sèn kèsh i un reibeweis for di un tas ku a keda den e outo. Ta investigando e kaso.

Detenshon pa manehá bou di influensia

Djárason 12 di febrüari, alrededor di 6.30 or di atardi, a detené un dama di inisial J.D.S. di 36 aña di edat na Kaya Korona pa manehá bou di influensia di alkohòl. E sospechoso tabata enbolbí den un aksidente entre dos vehíkulo riba e kaya menshoná. Konforme e maneho ‘botsen is blazen’ a hasi un tèst di supla ku ámbos shofùr for di kua a resultá ku e sospechoso a konsumí mas alkohòl ku ta permití na momentu ku bo ta manehá un vehíkulo. A detené i a hib’é warda di polis pa un análisis di rosea. A konsekuensia di e resultado di esaki a konfiská su reibeweis. E otro shofùr no por a mustra un reibeweis bálido i a haña un but.

Ladronisia na bich

Djárason 12 di febrüari a duna notifikashon di ladronisia na Playa Pal’i Mangel (Donkey’s Beach) situá riba e Bulevar E.E.G. Durante ku e doñonan tabata sambuyá, deskonosínan a bai ku 3 diferente tas ku kontenido. E tasnan tabata kontené entre otro vários tarheta, dos pasport, sèn kèsh, dos Apple iPhone, yabi i paña. E situashon tin atenshon di polis.

FUENTE:KPCN/LIVE99FM