Redakshon
Kralendijk,- E título mes ta splika kiko e Direktiva Diario ta hasi, es desir: papia ku imigrante, duna konseho hurídiko, referí personanan na otro organisashon, tuma kontakto ku instansianan y entamá kasonan den Korte.
Pero kiko e Direktiva General ta hasi? Direktiva General ta funshoná komo wowo y orea di FUIB. E Direktiva General ta konsistí di máksmalmente dos representante di kada grupo étniko na Boneiru.
Por ehèmpel, un of dos Colombiano, un of dos Haitiano, Dominano, Venezolano etc.
E miembronan di Direktiva General ta para na snèk y ta papia ku imigrantenan. Nan ta papia ku nan koleganan na trabao. Nan ta skucha bon ki sorto di problemanan imigrantenan tin.
Nan ta splika ki responsabilidat- y derechonan imigrantenan tin. Nan ta referí personanan na FUIB pa wak kiko por hasi pa nan.
Por kompará esaki ku sindikalismo, kaminda den kada kompania grandi semper tabatin un of dos ‘shop-steward’, kendenan semper ta den kontakto estrecho ku e sindikato konserní.
Nota bon sí, ku FUIB no ta un sindikato. FUIB ta yuda imigrantenan ku diferente tipo di problema, manera problema ku estadia, problema di salú (por ehèmpel ilegalnan ku mester di tratamiento médiko) y otro problemanan hurídiko of no-hurídiko.
FUIB lo no representá trahadónan den un relashon kolektivo pa ku doñonan di trabou. Tin biaha den kasonan individual FUIB por yuda ku problemanan laboral sí. Pero no kolektivo.
Pues FUIB mester di representantenan den kumunidat pa buska informashon y pa yuda imigrantenan. Esei ta loke miembronan di Direktiva General ta hasi.
Si bo ta imigrante y kier yuda FUIB funshoná mas mihó y mas efektivo, por fabor tuma kontakto ku abog. M. Bijkerk, tel. 796 2650. Pa evitá problema ku imigrashon, mester ta personanan ku tin un pèrmit di estadia pemanente kaba.
Tur djasabra Fundashon ‘Union di Imigrantenan Boneriano’ (FUIB) tin un konsultoro hurídiko grátis di 4’or te 6’or di atardi na Ofisina di Abog. Bijkerk na Antriol. Adrès: Kaya Jose G. Hernandez 16A.
FUENTE: FUIB/LIVE99FM
GIPHY App Key not set. Please check settings