31 DI YANÜARI ÚLTIMO TA MARKA UN DIA PRETU DEN HISTORIA DI FUTBÓL NA BONEIRU. UN INSIDENTE YA KONOSÍ A SOSODÉ KAMINDA KU A MALTRATÁ UN RÈFRI.

Kralendijk,- FFB ta kondená ku firmesa ku a maltratá un di nos rèfrinanan. Ta inaseptabel ku un rèfri ku ta e kadena indispensabel pa garantisá un wega di bala honesto i seif ta keda eksponé na agreshon físiko, verbal òf emoshonal.

Agreshon kontra rèfri ta kontra balornan di rèspèt, disiplina I integridat ku pa FFB ta hopi importante. E komportashon aki ta kontra norma i balor di e deporte di futból i nunka FFB lo no tolerá esaki.

Nos a tuma akshon di imediato dor di skors kampionato pa dos siman i pa a warda relato di loke a sosodé.

A  sinta  ku komishon di rèfri i tambe a hiba kombersashon ku stakeholdernan relevante pa asina nos por tuma medida pa evitá ku esaki por bolbe ripití.

Despues di e insidente a hiba kombersashon ku komishon di rèfri ku huntu ku FFB a yega na diferente sugerensia. Pa e tim di rèfri a regla ‘slachtofferhulp, pa asina nan por a papia ku un eksperto pa  nan por  haña guia pa prosesá loke a sosodé ku un miembro di e tim di rèfri.

FFB a alargá e periodo di skòrs di kampionato ku dos siman mas . Aktualmente kampionato ta planeá pa sigui den e promé siman di mart.

Nos ta hasi un apelashon na tur hungadó, fanátiko, ofishalnan, direktivanan, komishonnan I tur ku ta forma parti di e komunidat di futból pa huntu nos bisa NO na violensia den deporte.

FFB ta bai reuní ku ekiponan pa  wak huntu kon por traha preventivo pa kosnan no tin ku eskalá nunka mas durante di wega di futbòl. Fanátikonan tambe tin un ròl den esaki . Lo bai hasi un apelashon riba fanátikonan pa nan tambe yuda tene e wega di futbòl sèif i sigur pa tur  ku ta forma parti di e mundu di futbol.

FUENTE: DIREKTIVA DI FFB/LIVE99FM