Kralendijk,- BON DOET ta e akshon mas grandi di boluntario na Boneiru, kaminda organisashonnan sosial i gruponan di boluntario lo bini huntu pa kolaborá pa un meta komun na benefisio di nos isla.
NGO Plataforma ta organisá BON DOET den kolaborashon ku Oranje Fonds.
E aña aki, ACE Foundation a registrá e promé djòp di BON DOET. E fundashon ta buskando boluntarionan pa yuda ku diferente trabou na nan lokalidat. Entro otro konstruí i pinta huntu un dekòr pa siman di músika pa mucha. I entretantu tin diferente organisashon mas ku a registrá nan djòp pa BON DOET 2025.
NGO Plataforma ta invitá tur organisashon sosial pa registrá nan djòp pa BON DOET. Último fecha pa hasi esaki ta 1 di mart 2025.
Un djòp por ta por ehèmpel drecha un lugá di un fundashon òf e por ta algu organisatorio manera traha un kalènder di aktividatnan huntu, pero e por ta un aktividat tambe ku e grupo di enfoke di e NGO, manera un keirumentu ku grandinan.
Pa e NGO-nan ku kier partisipá ku BON DOET, tin posibilidat pa apliká pa yudansa finansiero te ku $ 650,-. E montante disponibel ta pa kada lokalidat i Oranje Fonds ta evaluá e djòpnan si nan ta bini na remarke pa e kontribushon ku tin disponibel pa BON DOET. Pues ta hopi importante pa registrá e djòpnan mas pronto ku ta posibel pasobra esun ku yega promé ta bebe awa limpi (òp=òp)!
Tim di BON DOET kier hasi un apelashon na tur NGO di Boneiru pa registrá nan djòpnan via e wèpsait www.bondoet.com.
Krea un profil of “log in” i sigui e pasonan pa registrá bo djòp. Riba www.bondoet.com tin tur informashon kon pa yena e formularionan di petishon i kiko tur e kondishonnan ta pa partisipá komo organisashon.
E yenamentu di petishon pa BON DOET ta fasil, pero si bo keda pegá, nos tei pa yudabo. Riba djabièrnè mainta entre 10’or i 12’or por pasa na ofisina di NGO Platform na Kaya Soeur Bartola 15A si mester di ayudo pa registrá djòp. Por tuma kontakto tambe via whatsapp 777-2366 of e-mail: ngo.bondoet@gmail.com.
FUENTE: BONDOET/LIVE99FM

GIPHY App Key not set. Please check settings