Kralendijk,- Imigrantenan na nos islanan semper mester tene hopi kuidou pa nan no kai den e tranpa di ‘buraku di estadia’. Of ‘hueco de estadia’ na Spañó. Esaki ta referí na lo siguiente.
Mayoria di imigrantenan na Boneiru a bini aki, pasobra un doño di trabou tabatin mester di nan labor. Pues nan a wòrdu invitá pa bini akinan, pasobra no tatin sufisiente trahadónan lokal.
Pa por traha na Boneiru un imigrante mester di un permit di trabou plùs un permit di estadia.
Tin otro situashon tambe, manera un imigrante ku ta bin pa invertí na Boneiru. Pero nos ta limitá nos mes na e mayoria di imigrantenan. Mayoria di nan ta aki, pasobra nos a invitá nan pa bin traha aki.
E permit di trabou y di estadia ta wòrdu duná pa un aña. Kada aña mester renobá nan.
Y kada aña gobièrnu ta kontrolá si no tin hende lokal ku por hasi e trabou. Si tin un hende lokal, e ora ei gobièrnu ta nenga di renobá e permitnan y e imigrante mester regresá su pais. Te despues di 5 pèrmit anual, e imigrante por haña su permit di estadia permanente.
Nos no ta diskutí ku mester di lei. Pero leinan mester ta hustu sí. Kiko ta pasa si un imigrante a haña su mes den e situashon kaminda su permit a kaduká y e siguiente permit no a wòrdu otorgá ainda. E ora ei, e imigrante ta ‘ilegal’ durante un periodo korto. E por ta un siman, of un luna. Esei ta wòrdu yamá un ‘buraku di estadia’.
Tin biaha e imigrante mes tin falta ku tin un ‘buraku di estadia’. Tin biaha e doño di trabou tin falta. Tin biaha ta gobièrnu mes tin falta. Pero e konsekuensia negativo semper ta pa e imigrante. Pasobra e ‘buraku d estadia’ ta enserá ku e periodo di 5 aña pa haña un ‘permit permanente ta kuminsá kana di nobo for di e momentu ku a otorgá e permt despues ‘buraku’.
Sa sosodé ku un imigrante ta haña su mes konfrontá ku un ‘buraku di estadia’ despues di 4 aña. E ora ei, e mester warda 5 aña mas pa e por haña su permit permanente.
Total 9 aña pues.
Esaki ta un regla inhustu. E konsekuensia of ‘kastigu’ di un ‘buraku di estadia’ ta opviamente disproporshonal.
Ta komparabel pa duna un mucha un kastigu di 4 aña di prizòn, pasobra el a hòrta un pan. Asina nos no mester trata hende. E Regla di Buraku di Estadia mester wòrdu apliká proporshonalmente. Por ehèmpel, si e ‘buraku’ a dura un luna, e ora ei, e imigrante mester warda un luna èkstra (pues 5 aña mas un luna) promé ku e por haña su permit permanene.
Nò 5 aña èkstra pa un fayo chikitu di un luna.
Tur djasabra for di 4’or te ku 6’or di atardi, Fundashon Union di Imgrantenan Boneriano (FUIB) huntu ku abog. Bijkerk tin un konsultorio grátis pa imigrantenan.
Nos ta wak kon por yuda kualkier imigrante na un forma legal. Migrantenan ilegal tambe por bini. Tin biaha tin manera legal pa legalisá nan estadia.
Dependé di nan situashon. Boneiru te ainda ta un isla kaminda ta trata hende humanamente. Nos tur mester hasi nos best pa mantené esei.
FUENTE: FUIB/LIVE99FM

GIPHY App Key not set. Please check settings