AFBW I GERENSIA DI FUNDASHON CAS BONERIANO I FUNDASHON KRÉDITO BONERIANO A FIRMA PROLONGASHON DI E CAO EKSISTENTE

Kralendijk – E sindikato AFBW i gerensia di Fundashon Cas Boneriano i Fundashon Krédito Boneriano riba djabièrnè 24 dia yanüari a firma prolongashon di e CAO eksistente. E prolongashon a keda lográ después ku e dos partidonan den bon harmonia a dialogá i negosha algún kambio di importansia i ku tabata na benefisio di e trahadonan. E durashon di e CAO lo ta te fin di dézèmber 2027.

Tantu vise-presidente di AFBW, sr. Jose Capella komo e direktor di FCB/FKB sr. Ben Oleana a enfatisá e bon relashon entre e sindikato i e fundashon. Tambe a trese dilanti e dedikashon, pashon i amor ku e trahadónan ta demonstrá pa nan trabou den e fundashonnan. Mi ta apresiá esaki enorme, sr. Oleana a trese dilanti i kaminda tin espasio semper lo mi kontribuí na mehorá e kondishonnan di trabou. Pa e komprenshon ku AFBW ta duna pa esaki tambe mi ta apresiá i ta demonstrá ku e sindikato ta hiba un maneho responsabel.

Fundashon tin retonan interesante su dilanti i apesar ku lo bai den direkshon di outomatisashon, lo mester bai na ekspandé e kantidat di trahadó. E proseso pa Fundashon Cas Boneriano bira un asina yamá “toegelaten instelling” ta kanando positivamente. Esaki lo nifiká ku Fundashon lo por haña fiansanan riba merkado Ulandes kontra interesnan muchu mas abou i faborabel ku aktualmente ta e kaso. Esaki lo trese kuné ku Fundashon lo por bai na konsruí mas vivienda sosial na preisnan pagabel. Ku firmamentu di e CAO ku Fundashon, AFBW a marka algo históriko atrobe, esta den un siman di tempu firma dos CAO. A habri siman ku firmamentu di Cao ku Telbo, mientras ku a será siman ku firmamentu di prolongashon di un CAO ku kambionan ku Fundashon Cas Boneriano. Tur dos CAO ku bon kondishonnan laboral pa tur e trahadonan.

Na final tantu Jose Capella komo Ben Oleana a gradisí e timnan negoshadó di ambos partido i tambe konsehero prinsipal i alabes negoshadó Norwin “Nòchi” Willem pa e forma profeshonal i harmonioso i ku rèspèt ku a hiba e negosashonnan ku den un tempu kòrtiku por a finalisá ku un akuerdo.
Riba e fotonan ku ta kompañá e komunikado momento ku prensa a eternalisá e momento di firmamentu di e CAO den presensia di tur esnan ku a kontribuí pa realisá esaki.

FUENTE: FCB/FKB/LIVE99FM