REPRESENTANTE  DI REINO SUPLENTE A DETERMINÁ KU E ENTIDAT PÚBLIKO DI BONEIRU (OLB) A FAYA DEN SU RESPONSABILIDATNAN DEN E MANEHO DI PROSESAMENTU DI SUSHI PA MEDIO DI SELIBON.

Kralendijk,-A base di rapòrtnan di inspekshon resién, a konkluí ku tabatin un negligensha di tarea di parti di OLB, pa motibu di supervishon inadekuá i falta di pèrmitnan nesesario.

P’esei, i en general no tabata un sorpresa, ku a base di esaki e representante di Reino a disidí di intervení temporalmente. Komo parti di e intervenshon lo tuma over e tareanan relashoná ku lisensiamentu, supervishon i mantenshon di prosesamentu di sushi.

Remarkabel ta ku e representante di Reino ta konkluí ku diferente kolegionan ehekutivo no a logra solushoná e problema di desperdisio. Ku e frase aki ta parse ku e representante di Reino kier tene e kolegio aktual parsialmente for di bientu, loke ta lanta sierto intorogansia.

E dos kolegionan anterior tabata keda sostené pa e frakshonnan di UPB i MPB, i e kolegio di 2019 pa 2023 a kompletá henter e periodo despues di hopi tempu, i a sòru pa e maneho i atministrashon finansiero tabata kompletamente na òrdu, loke a resultá den dos relato anual ku a karga e seyo di aprobashon dor di e akoutènt eksterno.

Na febrüari 2021, a hasi preguntanan na e Minister hulandes di Infrastruktura i Maneho di Awa di e tempu ei tokante e bashamentu di sushi na e lèntfel.

E kontesta tabata ku enbèrdat ta basha sushi tumando na kuenta e echo ku e kantidat di residentenan a subi,  i kompania- i bishitantenan ku tabata kresiendo rápidamente. E tempu ei hopi konstrukshon tabata andando, ku tambe ta kondusí na un aumento di desperdisio di konstrukshon i di hardín. Sinembargo e minister tambe a indiká ku a realisá un sentro nobo di separashon di desperdisio parsialmente ku plaka di e ministerio.

E minister a indiká tambe ku e lèntfel tabata yegando su límitenan.

Dentro di e programa lokal ‘Afval op Maat’, lo hasi eskohonan fundamental promé ku 2023 tokante kon pa atendé ku e volúmennan di desperdisio residual ku ta keda despues di separashon. Sigui ku e método di lèntfel òf insinerashon, òf opshonnan pa transportá sushi pa prosesadónan pafó di Boneiru, lo wòrdu analisá. Sinembargo, e aktividatnan aki a tarda i a kai kòrtiku pa motibu di e pandemia di Covid.

E intenshon tabata pa huntu ku gobièrnu di Hulanda traha riba un solushon duradero. Wak por ehèmpel e ‘regeling bijzondere uitkeringen afvalbeheer Bonaire 2020-2023’. Artíkulo 2 ta preskribí ku e minister riba petishon i den e aña di kalènder por duna supsidio na OLB pa loke ta trata proyektonan deskribí den e rapòrt ‘Afvalbeheer op Maat 1’.

Tambe mester mustra riba e proyekto di e büro di Implementashon (PUB) ku a wòrdu lanta na 2022 ku e meta pa hunga un ròl krusial pa logra resultadonan visibel pa e residentenan di Boneiru den e próksimo añanan. Un kantidat limitá di proyekto a wòrdu inisiá denter di e PUB, inkluyendo kombustibel i infrastruktura/kaminda, i mas lat den e aña lo a kuminsá ku e programa di ‘Afvalbeheer op Maat’ i e plan di maneho di naturalesa i medio Ambiente.

Nos no a yega 2025 ainda, pero kiko e kolegio aktual a formulá komo maneho pa loke ta trata maneho i prosesamentu di sushi ? E presupuesto di 2025 ta bisa ku e kolegio aktual lo enfoká riba formulá un maneho integral di desperdisio i prosesamentu di desperdisio pa asina redusí nos desperdisio residual mas tantu posibel i, kaminda ta posibel, kombertí e fluhonan di desperdisio den aktividat ekonómiko.

OLB a pone USD 100.000 disponibel pa 2025 i 2026 pa formulá i implementá un maneho i prosesamentu di sushi. Ademas, OLB lo pone USD 100.000 strukturalmente disponibel entrante 2025 pa e programa ‘Tene Boneiru Limpi’.

E kolegionan anterior a establesé un maneho ku pa 2024, strategianan di maneho di desperdisio efektivo lo wòrdu desaroyá pa minimalisá e kantidat di desperdisio.

Lo hasi invershonnan den teknologianan avansá pa prosesamentu i resiklahe di desperdisio, ku e meta pa eliminá e nesesidat pa basha e mayoria di e fluhonan di desperdisio pa 2030 na lèntfil. Pa fluhonan di desperdisio ku no por wòrdu prosesá lokalmente, e desperdisio lo wòrdu hibá pa mas prosesamentu na otro lokalidatnan di akuerdo ku tur regla i norma internashonal. E ariba menshoná naturalmente ta wòrdu hasí den estrecho koperashon ku Hulanda.

Hasta a lanta un asina yama ‘change team’ pa spesífikamente ataká e problema hunto ku Hulanda, pero konsehal Vrolijk a haya ku ta nesesario pa manda e kolegio anterior kas. Ku e koalishon aktual i e kolegio ehekutivo no a mustra ningun inisiativa di nada, i pues asina tambe nan inkapasidat, pa solushoná e problema di lèntfel huntu ku Hulanda, i kier pone un  100.000 dòler débil disponibel na 2025 pa formulá i implementá un maneho di prosesamentu di desperdisio, ta enfatisá e nesesidat pa e intervenshon ku a tuma lugá.

E kolegioi aktual a opta klaramente pa deskontinuidat di maneho i akuerdonan establesé. Pues e representante di Reino no mester bin bisa nos ku e kolegionan anterior no a hasi nada pa yega na un solushon duradero huntu ku Hulanda

FUENTE:WILLEM A. CECILIA/LIVE99FM