INTERVENSHON TA E UNIKO OPSHON PA SIUDADANONAN

Kralendijk,- Pro Lagun ta sorprendi pa e sorpresa ekspresa di Konseho Ehekutivo den nan karta na Representante di Reino.

Nos i habitantenan ta na fabor di e idea ku e Konsehonan Ehekutivo, bou di direkshon di e Representante di Reino, buska koperashon ku Hulanda Oropeo.

Ta p’esei Pro Lagun ta hasi un yamada na Konseho Ehekutivo pa kolabora ku Hulanda Oropeo na bienestar di e siudadanonan di Boneiru.

No traha kontra e sosten aki, ku realmente por kontribui na un progreso sigura.

E habitantenan di Boneiru ke duna prioridat na inisiativanan ku ta kondusí na solushonnan na bienestar di henter e isla, tantu riba término kòrtiku komo riba término largu.

Pro Lagun ta keda profundamente preokupá tokante e impaktonan di salú duradero riba nos komunidat i e nesesidat urgente pa atendé daño ambiental históriko i impaktonan di salú públiko.

Ainda tin akshonnan importante ku no a wòrdu implementá, manera inisiá un investigashon profundo di salú i medio ambiente, relokashon temporalmente di e habitantenan afektá te ora ku nan seguridat por wòrdu garantisá, i ku paga e kandelanan bou di tera.

 Miéntras ku progreso a wòrdu hasí

 — manera e monitoreo di riesgo di kandela di Selibon i e partisipashon di Pro Lagun den e kòmbersashonnan

— asuntunan importante ainda ta keda sin liñanan di tempu konkreto i kompromisonan akshonabel. Esaki ta inkluí un plan di saneamentu di e landfill i regulashonnan ambiental mas estrikto.

E siman aki nos ta yama bon biní na e bishita di RIVM pa evaluá e konsekuensianan di e kandela. Nos ta antisipá riba mas akshon i esfuerso di Departamentu di Salubridat Públiko pa salbaguardiá nos salú, por ehèmpel dor di krea un monitoreo kontinuo di kalidat di aire i investigá e impakto riba salubridat públiko.

E pasonan aki ta krusial pa konstruí konfiansa i garantisá e seguridat di nos komunidat. Por último, Pro Lagun ke ekspresá su apresio pa e pasonan ku ta tumando dor di tur partido enbolbí, tantu na Boneiru komo na Hulanda Oropeo, pa atendé e problemanan di hopi tempu na Selibon.

Nos ta rekonosé e retonan ku Konseho Ehekutivo ta enfrentá i ta apresiá nan rekonosementu di e urgensia di e situashon, i tambe e envolvimentu aktivo di e Representante di Reino den tumamentu di medidanan nesesario. Nos ta agradesido tambe pa e invitashonnan ku nos a risibí pa partisipá na e promé diskushonnan ku tantu e Representante di Reino komo e Konseho Ehekutivo, pa asina nos bosnan wòrdu skuchá.

Na interes di komunidat, nos ta bolbe menshona nos eksigensianan, ku nos a publika dia 14 di Òktober ultimo:

Pro Lagun ta eksigí:

• Denter di 30 dia:

· Kuminsá un investigashon ekstenso di salú i medio ambiente dor di RIVM.

 · Traha un plan konkreto pa paga e kandelanan bou di tera.

· Perkurá pa realohamentu temporal di e residentenan serka di e landfill te ora ku nan seguridat por wòrdu garantisá.

· Involukrá Pro Lagun den tur diskushon pa vigilá i sigui e progreso.

Nos ta urgi tur partido enbolbí pa no solamente pone prioridat na medidanan di kòntròl agudo, pero tambe pa desaroyá i implementá solushonnan duradero a largu plaso ku ta pone salú na promé lugá. Solamente dor di traha huntu nos por logra e restourashon ku Boneiru meresé.

Nos ta wardando riba e kontesta di Konseho Insular i mientrastanto nos ta konsiderando tur opshon ku ta posibel.

FUENTE:PRO LAGUN/LIVE99FM