KÒRTAMENTU DEN PRESUPUESTO DI TCB

Kralendijk,- Den varios artíkulo den prensa lokal a resaltá ku e miembro independiente di konseho insular sr. Vrolijk, a ekspresá su sorpresa tokante e krítika di e miembro di konseho insular  pa UPB i alabes eks-diputado sr. Kroon, den direkshon di ‘bestuurscollege’, spesífikamente dirigí riba e diputado enkargá ku Finansas. Sr. Kroon a ekspresá su disatisfakshon pa loke ta trata  e supsidio pa TCB, ku e ta konsiderá demasiado abou.

Nada nobo den tur esaki pero e hecho ku sr. Vrolijk a lansá un atake personal i brutu via un komunikado di prensa, kasi sigur riba instrukshon di lider máksimo di e koalishon, ta lanta bastante interogante.

Sr. Vrolijk ta akusá Kroon di pérdementu di memoria, politika bieu, keda pegá den pasado i hipokresia, tur esaki pa e oudasia ku Kroon a desplegá pa kritiká e lider máksimo di e koalishon i alabes diputado di Finansas pa loke ta trata e kòrtamentu den e montante di sèn disponibel pa TCB.

Loke ta remarkable di e reakshon aki ta ku sr. Vrolijk, ku a risibí apénas 30 voto i ku a bai ku su asientu na un manera inesperá pa duna e koalishon aktual un mayoria, a sinti nesesidat pa ataká sr. Kroon, ku a risibí 1.392 voto den e elekshon pasá.

Pero bon, instrukshon ta instrukshon.

Sr. Vrolijk a indiká ku Kroon mester a konsultá ku su koleganan pa investigá e posibilidatnan pa aumentá e supsidio pa TCB. Lider di frakshon M21, tambe miembro di e aktual koalishon  a asistí na e ‘Bonaire Tourism Summit’ i a ekspresá su apoyo pa mas invershon gubernamental den turismo, ku ta nèt den liña di pensamentu di sr. Kroon.

Sinembargo, durante e debate di e presupuestu 2025, ni Vrolijk ni e lider di M21 no a tribi di firma e amienda di MPB i UPB, ku ta proponé un aumento di e presupuesto di TCB. Probablemente esaki ta pa miedu di un reakshon furioso di e diputado di Finansas.

Sr. Vrolijk tambe ta di opinión ku mester investigá e gastu mará na un oumentu di e supsidio pa TCB. E no ta realisá ku ya kaba TCB tabata tin un supsidio èkstra di 500.000 riba presupuesto di 2024 ku ta yuda hopi bon pero entretantu a wòrdu kòrta.

Esei tambe ta konta pa M21 ku ta proponé pa medio di un moshon sènnan èkstra e aña aki mes pa TCB pa medio di un kambio di presupuesto 2024. M21 kisas no ta realisá ku aña ta kabando. Straño ta ku sr. Vrolijk no ta kofirmante di e moshon di M21 lokual ta indiká ku stratégikamente i táktikamente pa no papia mes di polítikamente, e ta hopi suak. 

Di su banda, e diputado di Finansas, Economía i Turismo  ferósmente a nenga ku a wòrdu kortá den e supsidio di TCB pa loke ta trata e aña 2024. E diputado ta bisa ku enbèrdat a kòrta den e sènnan disponibel pa TCB pero esaki ta debí na e finalisashon di e presupuesto temporario di e ‘Tourism Recovery Plan’, ku tabata dispònibel despues di pandemia di Covid-19. E lider di frakshon di partido demokrat tampoko no por a resistí e tentashon pa defendé su lider i pa medio di un komunikado di prensa a deklará ku e ta pará tras di e deklarashon di e diputado.

Aparentemente komo representante di pueblo ku mester sali na ínteres di e pueblo i ku ta su deber pa kuestioná e diputado no ta krusa su mente.

Pero kiko e realidat ta? TCB tin un kontrato di kuido manera nan ta yam’é ku ta bal 2 miyon dòler pa aña i tin un suma adishonal di 500.000 dòler riba e presupuesto di 2024. Riba página 23 di presupuesto di 2024 e suma adishonal di 500.000 dòler ta keda lo siguiente aklará:

E presupuesto ta inkluí e rekursonan regular pa e kontrakto di kuido di TCB, loke ta hasi sinembargo un ehekushon limitá di e plan di akshon pa promové turismo. E rekursonan adishonal di USD 500.000 lo fasilitá intensifikashon di aktividatnan di merkadeo i promoshon pa e merkadonan turístiko relevante pa Boneiru i tumamentu di e promé pasonan pa sigui profeshonalisá e organisashon, ademas di ehekushon di e programa anual.

E ‘aumento’, i realmente ta wòrdu referí na dje komo un aumento, tambe a keda  inkluí riba un base di mas aña den e tabèl di e proposishonan ku ta rekerí espasio finansiero riba página 23 di e presupuesto di 2024. Ku otro palabra, e gobièrnu anterior a sigurá porloménos 500.000 dòler èkstra pa TCB durante 2024 te ku 2027. 

Si henter e sektor di turismo inkluyendo e direktor di TCB ta papia di un kòrtamentu den e sènnan destiná pa TCB durante 2024, esaki pues no a kai for di shelu. Sin duda e kantidat di sèn disponibel pa TCB en realidat a wòrdu kòrtá.

E argumento di e konsehal pèrdèdó di memoria sr. Kroon, ta exitoso den tur aspekto, mirando su supstanshon lógiko tumando na kuenta e diferente entradanan di e entidat públiko, entre otro e ‘tourism tax’. Un eror stratégiko i táktiko eksepshonal di parti di e kolegio ehekutivo, lesa diputado di finansas, ku sin duda lo resultá den un daño notabel na e ekonomia di Boneiru.

FUENTE: WILLEM A. CECILIA/LIVE99FM