USIBO NA KONFERENSHA I KONGRESO STATUTARIO DI FTA.

Kralendijk,- USIBO a partisipá na e di 25 konferensha i kongreso statutario di FTA 2024, 4 delegado fraternal a partisipá na e tres dianan organisá pa e sindikato di mas grandi di ARUBA, FTA. 

USIBO (Union di sindikatonan Boneriano) tabata presente na e di “XXV Congreso Statutario i Konferensiá” di FTA (Federacion di trahadónan di Aruba) i alabes FTA ta konmemorá  e di 60 aniversario.

Riba invitashon di FTA, USIBO a partisipá ku 4 delegado fraternal na e kongreso aki, den persona di Mavis Abrahams, presidente di USIBO, Cherel Kwidama, tesorero di USIBO, Angelo Vrolijk, vice presidente i Norwin Willem konsehero di USIBO.  

Tabata tres dia di hopi eksperensia i konosementu den e mundu sindikal.

E tema tabata “Riesgonan Psychosocial den un mundu laboral kambiando”.

E promé dia parti anochi tabata tin e konferensiá ku diferente invitado i orador; promé minister di Aruba, minister di hustisia i asuntunan sosial, minister di labor, integrashon i energia, terapista  di departamentu di asuntunan sosial, konsehero di USIBO,  direktor di e Organisashon International di Labor (ILO) di Caribe, tambe tabata tin un pènel di diskushon, ku representante nan di dunadó di trabou, e departamentu di labor i leinan laboral i terapistanan, por a interkambiá pensamentu nan ku otro riba e tema “Riesgonan Psychosocial den un mundu laboral kambiando”.

E di dos dia i di tres dia tabata tin e di 25 kongreso statutario di FTA, kaminda a presentá e relato di e tres aña nan 2021 – 2024 i despues a bai na skohe e direktiva nobo pa e tres aña nan binidero.

Tabata un honor pa USIBO por a partisipá na e mesa direktiva transitorio i tambe forma parti den e komishon elektoral.

Bayendo i partisipando na e kongresonan sindikal aki, nos ta amplia nos konosementu i eksperensia.
Bo ta eksperensia i mira e diferente maneranan pa organisá kongreso a base di e diferente statutonan vigente. Tambe ta bon oportunidat pa sera konosí ku mas kolega sindikalista di e diferente paisnan, bo ta amplia bo konosementu i “netwerk”.

Nos por mira bek riba dianan di hopi konosementu i produktividat USIBO i sindikatonan a logra, logro nan grandi pa ekstendé laso nan di hermandat i di koperashon.

USIBO i sindikatonan na Boneiru ta konvensí ku riba tereno laboral tin hopi aspekto di interes komun komo nos ta forma parti  di Reino Ulandes i ta enfrentá e mesun retonan pa ku desaroyonan mundial, regional i lokal.

USIBO ta yama FTA pabien, ku nan di 60 aña i ku nan di 25 kongreso konstitushonal.

FUENTE:USIBO/LIVE99FM