DIÁLOGO DEN KUADRO DI EKSPLORÁ IMPAKTO DI SKLABITUT RIBA E KOMUNIDAT

Kralendijk,- Grupo di diálogo den kuadro di eksplorá impakto di sklabitut riba e komunidat aktual na diferente okashon a trese dilanti e punto di tereno ku ekskatibunan a haña den konseshon.

E istoria ta kuminsá na 1867 na momentu ku Gobièrnu a kuminsá duna tereno den konseshon na ekskatibunan pa praktiká agrikultura.

Tabata terenonan entre 0.6 pa 0.8 hektárea i a krea e posibilidat pa despues di tres aña kumpra e tereno na rason  di fl 10,- pa hektárea. Den añanan 1877 i 1883 a amplia e sistema i duna tereno mas grandi na hür.  Na 1886 gobièrnu a tuma e siguiente desishon..

Esnan ku durante sinku aña konsekutivo a planta i mantené nan tereno den bon kondishon ta haña e tereno den propiedat sin gastu.

Na 1924 a introdusí un lei ku, entrante promé di yanüari 1925, tur tereno mas ku trinta aña duná na konseshon òf na hür ta bira propiedat.

Abogado Nicolaas ta defendé esnan ku ta di opinion ku nan tin derecho riba sierto tereno.

Pa sa kon henter e prosedimentu di traspaso di tereno a tuma lugá lo ta bon pa un komishon komishon imparsial independiente hasi investigashon, finansiá for di e sinku mion reservá pa proyektonan den kuadro konmemorashon di abolishon di sklabitut i impakto di sklabitut riba e komunidat aktual.

Por konsultá e registro di 1911 di konseshon den e distritonan na Bonaire i lista di esnan ku a haña tereno den propiedat na aña 1896 i despues di 1925.

Tin persona ku dokumentu firmá pa gezaghèber ku por proba esaki. Desendientenan tin doló i mester aliviá e doló aki.

FUENTE:ARTHUR SEALY/LIVE99FM