ENTREGA DI SERTIFIKADO NA KURSISTANAN DI INSTRODUCTION TO ENTREPRENEURSHIP

Kralendijk, – Riba djaweps 12 di sèptèmber último, Qredits a hasi entrega di sertifikado na 15 kursista ku a finalisá e programa di ‘Introduction to Entrepreneurship’ ku éksito.

Qredits Boneiru ke felisitá e partisipantenan aki un bes mas pa a kompletá e kurso ku éksito i ke deseá nan tur kos bon ku e siguiente pasonan ku nan lo tuma pa sigui engrandesé nan konosementu empresarial i prepará pa e inisio di nan empresa na Boneiru.

E futuro empresarionan a risibí nan sertifikado ku hopi orguyo. Na inisio di e anochi Branch Manager, Milagros Blanken, a habri ku un spich ekspresando kon orguyoso e ta di mira kresementu den e 15 kursistanan i alabes duna nan palabra di éksito pa sigui perseverá i ekipá nan mes pa ta un empresario eksitoso.

Margyane Soliano, komo kordinadó di Training i Evento na Qredits i Jurvanis Clara, komo un di e kursistanan, tambe a kompartí nan eksperensia durante e trayektoria i a kompartí palabranan di gradisimentu i ekurashamentu na tur presente, i prinsipalmente na e graduadonan.

‘Introduction to Entrepreneuship’ ta un programa edukashonal di Qredits, ehekutá dor di Qredits.

Ku e programa aki Qredits ke stimulá e klima empresarial di Boneiru dor ofresé e kursista e oportunidat pa atkerí konosementu básiko di emprendementu na Boneiru. Tambe e kursista ta sondea e produkto i/òf servisio ku e lo por trese riba merkado. Di e forma aki aportá na desaroyo ekonómiko i sostenibel di Boneiru.

Durante un periodo di 5 siman, diferente lès balioso a keda duná dor di e tim di Qredits Boneiru. Tambe diferente ‘workshop’ i seshon di informashon a keda fasilitá dor di: señor Pierre Perigualt Monte, Konsehero Empresarial di Kámara di Komèrsio i Industria Boneiru (KvK), señora Raisa Statie, representante di Servisio di Impuesto, i señora Ferina van der Hoek. KvK i Servisio di Impuesto a duna e kursistanan informashon balioso tokante aspektonan importante pa por hasi nan empresa un éksito. Señora van der Hoek a hasi e kursistnan konsiente di e importansia di un bon maneho di presupuesto finansiero privá ora ke emprendé.

E programa tin komo base e trahamentu di un ‘Business Model Canvas (BMC)’ pa un produkto òf servisio pa medio di un programa digital, esta ‘e-learning’.

Via di e diferente seshon klasikal a kubri diferente tema importante pa desaroyá i engrandesé abilidatnan i konosementu empresarial di e kursista i yud’é kompilá e informashon relevante pa su ‘Business Model Canvas’.

Temanan manera entre otro kualidadesnan di un empresario, merkadeo i presentashon di un produkto òf servisio, i definishon di aspektonan finansiero básiko a keda tratá den e seshon nan. E kursistanan a finalisá e kurso presentando nan nan mes komo empresario i introdusí nan produkto òf servisio pa medio di un ‘pitch’ dilanti di un panel konsistiendo di un representante di Qredits, Perigualt Monte representando KvK i Maideline Hooi, kende ta un di e dosentenan di ‘Small Business Academy’.

Ku e konosementu basiko atkerí e kursistinan por sigui duna kontenido na nan idea empresarial dor di partisipá na ‘Small Business Academy di Qredits’ i/òf ‘KvK Acdemy’ di Kamará di Komèrsio i Industria.

Qredits Boneiru tambe ta gradisí Ministerio di Asuntunan Ekonomiko i Klima komo e partner prinsipal di e programa ‘Introduction to Entrepreneurship’ pa su sosten i pa kere den e importansia pa krea un base den e konosementu empresarial di futuro empresario na Boneiru, Saba i Statia.

Pa mas informashon tokante di Qredits Boneiru i ‘Introduction to Entrepreneurship’ por bishitá nos

wèpsait www.qredits.com. E wèpsait di Boneiru ta disponibel na papiamentu i na hulandes.

Tambe por tuma kontakto ku Qredits Boneiru su Kordinadó di Training i Evento, Margyano Soliano, via m.soliano@qredits.nl.

FUENTE:QREDITS/LIVE99FM