SITUASHON DI KORIENTE

Kralendijk,- Dos profeshonal di WEB a splika no solamente e problema ku a surgi ku koriente pero tambe di e proyektonan ku tin den tapara.  Si a skucha bon por a tende tambe ku transishon di energia tin atenshon. Kompania WEB ta trahando riba diferente senario pa konsipiá vishon, meta i plan di ehekushon. pa henter e ret di distribushon di energia ku kisas niun hende no ke tende ku ta kosta plaka. Direktor Silberie a trese e retonan loke el a yama “challenge”. Un kompania di utilidat tin ku tene kuenta ku desaroyonan den komunidat ku ta eksihí demanda grandi riba tereno di energia i awa. Esaki ta nifiká ku mester bini invershon pa garantisá distribushon di energia pero tambe  produkshon i distribushon di awa. Un reto grandi ta pa resolve problema ku pa un òf otro motibu pipa di awa i kabel di koriente a sufri daño. Nos ku ta usa awa i koriente ta obligá di komprondé ku invershon riba suministro di koriente i awa ta kosta miónes pero na 2030 lo e por surpasá un miar. Mirando konstrukshon riba eskala grandi ta nifiká ku kada luna lo mester hala kabel i pasa pipa di awa. Nos mester kòrda ku tipo di proyektonan mará na desaroyo di Bonaire no tur biaha ta sali manera a pensa ku e konsekuensia ku e suma por ta mas altu. Produktor di energia tin ku usa energia pa produsí energia. WEB mester di energia pa produsí awa i konsumidó ke koriente sin interupshon i preis pagabel E pregunta ta: Ken ta paga. Den nos mente mester bini un transishon di pensamentu pa e simpel rason ku gastu pa generá i distribuí energia lo subi. Autoriteit Consumenten Markt (ACM) ta kalkulá e preis ku konsumidó ta paga. A base di bo resibu di awa, di koriente, di kompra pa medio di Paga Bon bo por kalkulá kuantu sèn bo ta paga pa aña na awa i koriente. Kisas lo bo spanta i bisa, asina si mi no por sigui. Ta na Bonaire su atministrashon i WEB pa na un manera mas profeshonal ku ta mas ku solamente duna tep konsientisá pueblo riba uso di awa i koriente. Ta keda na nos kon usa energia i awa.

FUENTE:ARTHUR SEALY/LIVE99FM