SIERTO DOÑO DI TRABOU NO TA KUMPLI KU LEI LABORAL

Kralendijk,- Siman pasá a sali na kla ku den un kompania kaminda sindikalismo no tin representashon, kuantu kos robes ta tuma lugá. I laga nos ta sinsero, no ta na e kompania en kuestion so tin violashon di nos leinan laboral i tambe abuso i eksplotashon di e trahadó ta tuma lugá.

Na e kompania aki ela sali na kla ya ku e trahadónan a tuma kurashi uni nan mes i a bai inskribí nan mes komo miembro di un sindikato. Tambe e trahadónan manera nos ta bisa na bon papiamentu a basha abou na medionan sosial i tambe riba Facebook, whatsapp, sms i hasta a bai den programanan di radio i televishon. E kompania en kestion ta den e sektor di vigilansia i seguridat.

Na e momentonan aki tin un otro kompania ku trahadónan ku asistensia di sindikato a hiba nan kaso korte, ya ku mener a disidí di bandoná e isla i keda sin regla nada di loke e ta debe e trahadónan ku a traha p’e. Pero sindikalismo ta risibí diariamente keho di trahadónan no solamente den e sektor di vigilansha i seguridat, pero tambe den sektor di horeca, sektor di konstrukshon kaminda no solamente ta violá nos leinan laboral i ta eksistí situashonnan di abuso i eksplotashon, pero hasta tin señalnan ta drenta ku nos por papia di trafikashon di hende.

Sindikalismo a pone unidat di asuntunan sosial i di labor na altura di e situashon akipero tambe nos a hala atenshon di gobièrnu lokal pa loke ta trata e asuntu di uitzendburó kual ta reglá pa lei ku ta kai bou di responsabilidat di Entidat Públiko di Boneiru, ya ku ta ku pèrmit di Entidat Públiko por lanta i operá un “uitzendburó” i ku esaki ta mará na lei.

Un otro fenómeno ku ta lanta kabes riba nos isla ta e asina yamá komportashon indeseá na boka di trabou. Esaki ta un konsepto hopi amplio, pero ku ta kousa hopi trouma i fèrdrit serka e víktimanan. Ora nos ta papia di komportashon indeseá su fundeshi ta sintá den e relashon di poder dentro di un kompania, kaminda hefenan di departamentu ta malusá nan outoridat, nan poder pa hasi kos for di sla. Komportashon indeseá ta manifestá su mes den diferente forma, manera entre otro agreshon, tentamentu, preshon dimas di trabou, deskriminashon intimidashon seksual.

Nos ta papia di agreshon i violensha ora ta molestiá un trahadó ku palabra o fisikamente, menasé, intimidé òf ataké. Esaki por sosodé dor di koleganan mes, hefenan o klientenan. Tentamentu konstante por afektá salú di e viktima, pasobra ta tumé hasi kèns konstantemente. Deskriminashon a base di sekso, orientashon seksual, koló, desendensia i/o rasa por tuma lugá na diferente momento. Entre otro ora di solisitá, ora di haña promoshon, ora di oumentá salario, pero tambe dor di klientenan. Intimidashon seksual por manifestá den 3 forma o kombinashon di nan tres.

E ta tacha e dignidat di un persona. E tres formanan ta ku palabra. Aki por pensa na remarkenan ku un tinto seksual, chansa, preguntanan. E ta ku señanan o ekspreshon di kurpa. Por ehèmpel señanan seksual, mustra pintura potrèt pornográfiko o manda esakinan via mail, app òf sms. Finalmente e por tuma lugá a base di kontakto físiko direkto i esaki ta amplio. E por ta un brasa, un kinipi, un tek riba atras, sunchi te violashon kontra boluntat di e viktima. Intimidashon seksual por tuma lugá intenshonal pero tambe no intenshonal. Esaki ta hasi intimidashon  seksual difisil pa rekonosé. No ta bai pa e intenshon di esun ku ta kometé e akto, sino kon e viktima ta eksperenshá e komportashon.

Loke pa un ta inosente, pa e otro por ta ferfelo, indeseá o intimidante. Si

E Lucha sindikal pa seguridat di eksistensia no ta enserá solamente oumentá salario i trese esakinan den balansa ku e gastunan relativamente haltu di kosto di bida, pero ta enserá eksplísitamente mehorá e sistema di sirkumstansianan laboral. P’esei nos ta boga serka tur kompania na unda nos tin representashon pa nan tin un protokòl ku ta atendé ku komportashon indeseá. Nos hasta a entrega por eskrito un dokumento detayá i elaborá ku tur kompania por apliká den un forma inmediato.

FUENTE:NÒCHI WILLEM/LIVE99FM