PROSEDURA TRATAMENTU DI PRESUPUESTO 2025

Kralendijk,- Artíkulo 17 insiso 4 di e lei di finansa Boneiru, St. Eustatius i Saba (FinBES) ta preskribí ku e kolegionan ehekutivo di e entidatnan públiko, pa mas tardá promé di sèptèmber di kada aña mester entregá e presupuesto den konsepto di e siguiente aña serka nan konsehonan insular kaminda ta indiká kon a tene kuenta ku e rekomendashonnan di e kolegio di supervishon finansiero (Cft).

Konseho Insular di Boneiru a risibí e konsepto di e presupuesto  2025 riba djaluna 2 di sèptèmber 2024, ku por wòrdu konsiderá komo lat.

Ademas falta dos komponente importante den e pakete, esta e konseho di Cft i e karta di kolegio ehekutivo kaminda ta informá konseho insular kon a tene kuenta ku e i rekomendashonnan di Cft.

Si presentá un konsepto di presupuesto na konseho insular sin konseho di Cft i sin un karta akompañante kaminda ta indiká kon a tene kuenta ku e rekomendashonnan di Cft, esaki lo por tin vários konsekuensia.

Na promé lugá no ta kumpli cu e obligashonnan legal: según FinBES e presupuesto mester keda akompañá ku e konseho di Cft i un splikashon di kolegio ehekutivo kon a tene kuenta ku e rekomendashonnan di Cft. Si falta esaki, no ta kumpli ku e obligashon legal al respekto.

Na di dos lugá mester tene kuenta ku tardansa den e proseso.

Sin e konseho di Cft, konseho insular no por evaluá e presupuesto kompletamente, loke ta retrasá e proseso di aprobashon.  Konseho insular por disidí pa posponé tratamentu di e presupuesto te ora ku e konseho kompleto di Cft ta disponibel.

Na di tres lugá e entidat públiko di Boneiru ta kore riesgo ku Cft por intervení. Cft ta vigilá e finansas di e entidatnan públiko i por intervení na momentu ku no ta sigui proseduranan korektamente. Esaki por kondusí por èhèmpel na un atvertensia òf hasta intervenshon den e maneho finansiero di e entidat públiko.

Na di kuater lugá, e entidat públiko di Boneiru por enfrentá un posibel pèrdida di konfiansa. E falta di konseho i splikashon por kondusí na pèrdida di konfiansa di konseho insular den konseho ehekutivo òf den e maneho finansiero di e entidat públiko. Esaki por tin konsekuensianan polítiko.

I finalmente, e konsekuensianan finansiero tambe mester wòrdu menshoná. Si no aprobá e presupuesto na tempu esaki por kondusí na insertidumbre tokante gastu i invershonnan, ku na su turno por afektá e planifikashon finansiero i proyektonan di e entidat públiko.

Artíkulo 17 insiso 5 di FinBES ta preskribí ku e presupuesto den konsepto i su otro komponentenan, mesora ku esaki keda entregá na konseho insular, mester ta disponibel pa tur hende tira un bista i di esaki mester hasi un anunsio públiko.

E kolegio aktual ta kere ku el a kumpli ku e notifikashon públiko menshoná dor di solamente pone e konsepto di presupuesto riba su wèpsait. Ta lubidá ku e Programa Nashonal pa Suministrashon di Informashon Digital Duradero a indiká dia 13 di yüni 2023 ku e desaroyo di digitalisashon den tantu gobièrnu i e sosiedat boneriano ta kana mas slow na Hulanda Karibense. P’esei tin sentido pa pone e aviso aki den e korantnan i hasi anusio pa medio di radionan lokal, pa garantisá ku mas tantu informashon posibel ta yega na siudadanonan.

Mas aleu, artíkulo 18 insiso 1 di FinBES ta preskribí ku konseho insular, inkluso su komishonnan fiho, no por deliberá riba e konsepto di presupuesto mas trempan ku dos siman despues di e notifikashon públiko.

P’esei ta spantoso ku a yama un reunion públiko di e komishon fiho di I&K pa djamars 17 di sèptèmber 2024, ku punto di agènda 6: ‘Diskushon di e konsepto di presupuesto di OLB pa 2025.

E proseso di e di dos amienda di presupuesto a kana eksaktamente meskos, ku un sorpresa desagradabel un amienda introdusí den e reunion, den kua entre otro, US$ 600.000 legalmente destiná pa Bonaire Overheidsgebouwen (BOG) ta keda repriorisá for di e presupuesto di operashon pa e presupuesto di invershon. E akto aki lo pone BOG den problemanan finansiero serio. Ta bon konosí ku tin tenshon entre e direktor di Bonaire Holding Maatschappij (BHM), bou di kua BOG ta kai, i e diputado di Finansa. E relashon mutuo a fria, loke ta hasi koperashon ku otro difísil, resultando den un amienda ku por ser kalifiká komo un amienda den un amienda.

Ta di spera ku por lo ménos algun di e miembronan di konseho insular lo entregá un petishon pa posponé tratamentu di e konsepto di presupuesto 2025 te ora kumpli ku tur obligashon legal i komo tal pone un fin na violashonnan hurídiko pa asina tene kuenta ku  e nesesidat- i prioridatnan di vários grupo denter di komunidat boneriano. Kolegio ehekutivo i konseho insular mester ta konsiente ku mester tin espasio pa partisipashon i transparensia den tumamentu di desishon, pa tur hende sinti nan mes representá den e planifikashon finansiero.

FUENTE:WILLEM A CECILIA/LIVE99FM