E YAMADA NA TRAHADÓNAN KU TA SUFRIENDO BOU DI ABUSONAN, EKSPLOTASHON  I VIOLASHON DI  NOS LEINAN LABORAL A KUMINSÁ DUNA SU FRUTA.

Kralendijk, – E yamada di siman pasáa na trahadónan ku ta sufriendo bou di abusonan, eksplotashon  i violashon di  nos leinan laboral aki na Boneiru a kuminsá duna su fruta. Un grupo grandi di trahadónan di e kompania di seguridat Delta Security N.V. a disidí ku ta basta awor i a pone miedu un banda i den un forma disidido a reuní espontaneamente djadumingo 8 di sèptèmber na Parke Lalan Clarenda den Nikiboko i a invitá boso sirbidor pa duna nan informashon tokante nos situashon laboral aki na Boneiru i mas ku tur kos informashon tokante nos leinan laboral.

Den un forma unánime e grupo grandi na final a disidí di hasi un yamada na presidente di AFBW pa habri Kas Sindikal pa asina nan por a akudí aya pa dal e promé paso den nan lucha kontra inhustisia, abuso i eksplotashon di hende i masalmente nan a inskribí nan mes komo miembro di AFBW. Esnan ku no por a yega a manda nan mensahe di solidaridat na nan kompañeronan di trabou i e intenshon ta pa den transkurso di djaluna e sobrá trahadónan tambe pasa na kas sindikal i inskribí nan mes komo miembro. E siguiente paso lo ta ku AFBW lo dirigí su mes na e kompania via mediadó di gobièrno pa pidi rekonosementu komo e representante legal di interesnan laboral di tur trahadó na e kompania.

Ta di spera ku esaki lo bai den un forma positivo, sino lo mester  yama un referèndem pa asina formalisá legalmente e representashon.

Un atvertensia hopi serio ta bai na gerensia di e kompania i esei ta pa na promé lugá nan respetá inkondishonalmente e derecho konstitushonal di e trahadó pa afiliá na un sindikato. Na di dos lugá ta pidi e gerensia pa no tuma ningun, pero ningun medida kontra ningun trahadó pa e echo ku nan a disidí di afiliá. Djies kòrda ku den esaki e dunadó di trabou no por mete den ningun forma. Sindikalismo kier rekordá e trahadó ku e no tin apsolutamente ningun kuenta i rason di duna e dunadó di trabou si ela afiliá si òf nò na un sindikato. Meskos ku e no tin ningun obligashon pa informá e dunadó di trabou kua partido polítiko e ta simpatisá, kua religion e ta preferá, kua klup di deporte ta su faborito. Kualkier señal ku e trahadó haña ku e dunadó di trabou òf su  hefe kier mete den e derecho aki, e trahadó mester mèldu esaki mesora serka e sindikato.

Nos ta spera ku e akshon aki di e trahadónan di Delta Security lo por siribi komo ehèmpel di kurashi pa nan kompañeronan den otro kompanianan kaminda ta eksistí e mesun tipo di abuso, eksplotashon i violashon di nos leinan laboral. Finalmente nos kier rekordá e trahadónan di Delta Security ku for di e momento ku bo a bira miembro di AFBW, bo interes i kondishonnan laboral lo ser atendé pa AFBW. Pues bo mes no tin mester di enfrentá bo dunadó di trabou bo so, si bo sinti ku bo mester di yudansa i sosten. P’esei entrante djadumingo ku bo a bira miembro nos konseho ta NO FIRMA NADA sin konsultá ku bo sindikato i NO BAI ningun reunion bo so, bo tin derecho di bai kompañá ku un persona di bo konfiansa.

Awe mi kier manda un pabien sinsero na tur trahadó di Selibon i nan famia ku e rekonosementu ku nan a risibí Dia di Boneiru. Sin duda boso a meresé esaki. E ta nifiká ku boso lucha sinsero i kompletamente hustifiká ku boso a hiba 4 dia aña pasá pa rèspèt i rekonosimentu a duna fruta. Keda ku e aktitut positivo aki i boso por ta sigur ku boso sindikato huntu ku boso lo kontinuá inkansabel pa mehorá boso kondishonan di trabou den mas amplio sentido di palabra. Pa boso di Selibon en partikular pero pa e klase di trahadó en general mi kier pa boso graba e siguiente mensahe den boso mente i kurason.

E lucha sindikal pa seguridat di eksistensia no ta enserá solamente oumentá salario i trese esakinan den balansa ku e gastunan relativamente haltu di kosto di bida, pero ta enserá eksplísitamente mehorá e sistema di sirkumstansianan laboral.E ta pa digndiat humano en trabou tambe.