TIN DUNADÓ DI TRABOU KU TA PAGA BOU DI SUELDO MINIMO LEGAL DI $1750 PA LUNA PA UN TRABOU DI 40 ORA PA SIMAN.

Kralendijk, – Kehonan ku ta drenta serka sindikato ta ku tin dunadó di trabou ku ta paga bou di sueldo minimo legal, esta bou di Usd. 1750 pa luna pa un trabou di 40 ora pa siman, tin dunadó di trabou ta paga e sueldo minimo den dos pida, esta banda di fin di luna un mitar i den e promé dies dianan di e siguiente luna e di dos mitar; tin dunadó di trabou ku unilateralmente ta kita sierto kondishonann sekundario ku pa años e trahadó tabata risibí, manera entre otro su “vakantiegeld”; tin dunadó di trabou ta pone e trahadó traha mas ku 40 ora pa siman pa asina hustifiká e sueldo minimo. Sindikalismo kier trese dilanti ku tur e akshonnan menshoná ta illegal…punto.

Dunadónan di trabou ku ta kometé e akshonnan menshoná ta aktua kontra nos leinan i inspekshon di labor di ministerio di labor i asuntunan sosial mester aktua ku man duru kontra e violashonnan aki. Sindikalismo di su parti kier hasi un yamada na miembro i no-miembro di sindikato pa si bo ta eksperenshando un di e akshonnan aki pa pasa na kas sindikal ku bo kontrakt di trabou i bo slep di salario i asina duna bo keho ofishal i formal. Sindikalismo lo trata den promé instansha pa dialogá ku e dunadó di trabou pa e korigí e violashon aki i duné un tempu rasonabel pa hasi esaki. Dado kaso e reakshon di e dunadó di trabou no ta positivo sindikalismo lo aserká ministerio di labor su departamentu di inspekshon pa formalmente entregá keho kontra violashon di nos leinan laboral. I si dado kaso esaki no ta yuda no ta eksklui ku lo por entamá un kaso kolektivo na korte pa buska un sentensia di korte kontra e violashonnan aki.

Opviamente nòmber di e kompanianan ku ta kometé e violashon aki lo bin den publisidat komo mal dunadó di trabou. Sindikalismo na vários okashon a splika ku si dado kaso e oumento di sueldo minimo ta kousa inkonvenensia, mester bai Kámara di Komersio i/o ministerio di asuntunan sosial i presentá e kaso ku dokumentashon pa asina buska un solushon. Violashon di nos leinan nunka por ta e solushon i sigur no ora esaki ta perhudiká e klase trahadó i su famia.

Federashon di trahadónan Arubano, FTA ta bai konmemorá nan 60 aña di eksistensia den e siman di 18 pa 21 di sèptèmber próksimo ku un kongreso. Tema di e kongreso lo ta Riesgonan psigososial riba nos merkado laboral. Mas i mas sindikalismo ta bai ta realisando ku e tin ku bai enfrentá retonan nobo riba merkado laboral. Si pa años i dékadanan e enfoke tabata riba kondishonnan laboral, manera orario, dianan di fakansi, salario, penshun, kumplimentu di leinan laboral, seguro di malesa i desgrasia,. overtaim ets. Den un palabra riba e aspekto material di laboral, mas i mas e enfoke ta dirigi su mes riba e sirkumstansianan bou di kual trahadónan mester ehersé nan trabou. E desaroyonan modèrno di teknologia sin lugar a duda ta bai tin nan efekto riba e estado di ánimo di e trahadó durante su orario na trabou. Komponentenan manera organisashon di e trabou, kontenido di e trabou, ambiente di trabou, relashonnan personal na trabou,  inseguridat di trabou, balansa entre trabou i bida personal ta bai hunga un ròl importante den bida di e trahadó. Ku e desaroyonan aki, e riesgonan psigososhal ku e trahadó ta kore ta entre otro demanda haltu di trabou ku ta krea preshon i strès i ku ta resultá den burnout di e trahadó.

Komportashon ku ta surpasá limite di hefenan di departamentu ku ta enserá reakshon agresivo, abuso verbal, intimidashon i menasa ets. Falta di rekonosimentu di skucha e trahadó dor di su hefenan, tentamentu, diskriminashon ets i falta di guia i sosten di  profeshonalnan ku ta infleunshá e satisfakshon na trabou negativamente. Pues ta bon ku sindikalismo for di awor ta dialogá riba e tema aki pa asina kuminsá prepará pa por duna e ayudo, sosten i asistensia riba e temanan aki. Meskos ku sindikalismo ta boga pa un bentana hurídiko pa duna asistensia na e klase trahadó, sigur ta ku lo mester kuminsá pensa den lanta un bentana pa atendé ku bienestar mental di e trahadó den e ambiente nobo ku merkado laboral lo bai drenta den e próksimo añanan. Un bon inisiativa di FTA i un bon momento pa dialogá riba e tema aki ya ku USIBO tambe lo ta invitado na e selebrashon i kongreso di 60 aña FTA.

FUNETE: USIBO/LIVE99FM