DJASABRA AWOR TA BAI TIN E SIGUIENTE EDISHON DI NOS ZJILEA KU E TEMA INVERTI DEN FUTURO DI NOS MUCHANAN

Kralendijk, – Mucha ta milager. Nan tin hopi talento i ta manera un spòns ku kapasidat pa siña hopi kos. Segun yùfrou Thea Pauletta, ku a traha ku mucha pa 46 aña na kleuterschool, mucha mester di tempu pa krese i bira algu ku por yuda nos komunidat bai dilanti. “Bo no por duna otro lokual ku bo mes no tin. Pesei nos mester guia nos muchanan ku hopi amor i pasenshi”. Yùfrou Thea su mensahe ta: “Inverti den futuro di nos muchanan”.

Djasabra awor 31 di ougùstùs lo bai tin e siguiente edishon di e evento kultural ‘Nos Zjilea’ na Mangazina di Rei ku e tema “Inverti den futuro di nos muchanan”. Un periodo di skol nobo a kaba di kuminsa i pa anima yùfrou, maestronan di skol, mucha i hoben, yùfrou Thea Pauletta lo konta tokante di su eksperensha trahando na kleuterschool. Sr. Marlon Mercera, un di yùfrou Thea su eks alumnonan, lo komparti ku públiko kon dushi su tempu na kleuterschool tabata. Tambe lo pone atenshon riba spèlnan ku tabata hunga e tempu aya. Pa stimula papiamentu di Papiamentu Mangazina di Rei huntu ku Akademia Papiamentu ta sigui ku e konkurso yama “#retapapiamentu”.

Papiamentu ta un idioma riku i e tin su mes palabranan. No tin nodi di usa palabranan na hulandes òf ingles den dje. Bin partisipa i yuda alsa nos dushi papiamentu. Dimes Marshe Krioyo no por keda afo ku su produktonan fresku i lokal manera ku bo a kustumbra kune. Kushina ta habri for di 10’or di mainta pa keinta e stoma ku un dushi sòpi. Pa mèrdia bo por haña diferente platonan krioyo i un dushi grill. Tur esaki den un dushi ambiente ameno ku presentashonnan “LIVE” di e banda “Tutti Frutti”. E pareha bailado “Duo Mirasol” no por keda afo ku nan bailenan di kita sombre. Ban brasa, selebrá i kompartí nos dushi kultura na ‘Nos Zjilea’, é evento kultural di tur luna, djasabra awor 31 di ougùstùs di 10 ‘or di mainta te ku 3 ‘or di atardi na Mangazina di Rei. Entrada ta gratis.

FUENTE: MAGAZINA DI REI/LIVE99FM