Redakshon
Kralendijk,- Resientemente dos Boneriano a partisipá den e kaminata di Vierdaagse na Nijmegen i nan a keda defroudá, kaminda aya a bisa nan, Boneiru no tin bandera.
Ta trata di konosido kanadónan di Vierdaagse Nijmegen Roy Martines i Nazario Alberto.
Nan a konta prensa esaki i nan ta deseá pa esnan konserní, duna atenshon na e situashon pa trese klaridat. “2022 tabata e último aña, ku bandera di Boneiru a bula na banda di e barometer na Nijmegen. Na 2023 i e aña aki, no tabatin Bandera di Boneiru kologá, meskos ku ta e kaso ku e otro bandera di e paisnan ku a partisipá na e kanamentu menshoná.
Promé ku 2023, semper e bandera di Boneiru tabatei. No sa kiko ta e motibu eksakto ku a kit’e.”
Nazario konta ku el a puntra un dama ku ta traha na e vierdaagse Nijmegen i e kontesta tabata, Boneiru no ta miembro di komité olímpiko. Nazario ta kere e dama a kontesta djis pa saka su kurpa di e situashon.
“Nos a puntra un otro persona haltu den e organisashon di e kanamentu na Nijmegen i el a bisa ku Boneiru no tin bandera mas. Aki na Boneiru Nazario a bai serka un persona ku bon konosementu di e asuntu di bandera di Boneiru i el a buska i haña informashon, ku Boneiru su bandera ta normalmente rekonosé. Boneiru tin su bandera.
Djadumingu promé ku e kaminata di Vierdaagse Nijmegen, tin e parada di bandera i na entrada di Nijmegen, tabatin e bandera di Boneiru i nan a kita esei tambe.
Kòrsou no ta rekonosé den komité olímpiko, pero su bandera si tabatei.”
Nazario a konta, ku for di tempu e i Marcel Nhar a kana e kaminata pa promé biaha, nan a bai ku bandera i el a keda kologá aya te ku 2022. Ya ta 20 aña a pasa ku Nazario a bai e kaminata pa promé biaha.
“Nos ke pa diputado di deporte, gezaghèber John Soliano i protokòl informá kiko ta e motibu, ku e bandera di Boneiru no ta na Nijmegen mas durante kaminata. Anto si esei ta korekto ku e bandera no por tei, gobièrnu di Boneiru mester a informá, ku Boneiru no tin bandera mas. E organisashon di Viedaagse Nijmegen a gradisí nos, pa nos partisipashon i ta deseá pa mira nos mas biaha.”
Por mira tambe e informashon ku nan a haña ku Boneiru su Bandera ta eksistí. Riba potrèt Nazario i Roy i bandera di Boneiru den man, pero no riba e bòshi di bandera parti patras di nan, na banda di e barometer na Nijmegen. Nan ta pidi pa un aklarashon tokante Bandera di Boneiru.
FUENTE:FITTIPALDI/LIVE99FM
GIPHY App Key not set. Please check settings